ଆସନ୍ତାକାଲି ପଞ୍ଚାୟତ ନିର୍ବାଚନ ଲାଗି ପ୍ରଥମ ପର୍ଯ୍ୟାୟ ଭୋଟ ଗ୍ରହଣ।। ବିଭିନ୍ନ ଭୋଟ ଗ୍ରହଣ କେନ୍ଦ୍ରକୁ ପୋଲିଙ୍ଗ ପାର୍ଟି ପଠାଗଲା।
ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଲାଗି ଆସନ୍ତାକାଲି ପ୍ରଥମ ପର୍ୟ୍ୟାୟରେ ଭୋଟ ଗ୍ରହଣ କରାଯିବ। ଚଳିତ ନିର୍ଵାଚନରେ ୬ ହଜାର ୭୯୪ ଗ୍ରାମ ପଞ୍ଚାୟତରେ ୯୧ ହଜାର ୯୧୩ ୱାର୍ଡରେ ଭୋଟ ଗ୍ରହଣ ହେବ ।
ସୁରକ୍ଷା ଲାଗି ୨୨୫ ପ୍ଲାଟୁନ ପୋଲିସ ଫୋର୍ସ ବୁଥ୍ ଦାୟିତ୍ୱରେ ମୁତୟନ କରା ଯାଇଛି।ସୁନ୍ଦରଗଡ଼ ଜିଲ୍ଲାର ୪ ଟି ବ୍ଲକ ରେ ଆସନ୍ତାକାଲି ତ୍ରିସ୍ତରିୟ ପଞ୍ଚାୟତ ନିର୍ବାଚନ ଲାଗି ଭୋଟ ଗ୍ରହଣ କରାଯିବ। ବଡ଼ଗାଁ , କୁଆରମୁଣ୍ଡା , ଲାଠିକଟା ଏବଂ ବଣାଇଗଡ଼ ରେ ୮ ଟି ଜିଲ୍ଲା ପରିଷଦ ଲାଗି ଭୋଟ ଗ୍ରହଣ କରାଯିବ। ସମୁଦାୟ ୬୬ ଟି ଗ୍ରାମ ପଞ୍ଚାୟତ ର ୮୭୩ ଟି ବୁଥ ରେ ଭୋଟ ଗ୍ରହଣ କରାଯିବ। ଭୋଟ ଗ୍ରହଣ ଲାଗି ବିଭିନ୍ନ ବ୍ଲକ ରୁ ବ୍ୟାଲଟ ବକ୍ସ , ବ୍ୟାଲଟ ପେପର ଏବଂ ଅନ୍ୟାନ୍ୟ ଆନୁସଙ୍ଗିକ ସାମଗ୍ରୀ ଆଜି କଡା ସୁରକ୍ଷା ବ୍ୟବସ୍ଥା ମଧ୍ୟରେ ଜିଲ୍ଲାର ବିଭିନ୍ନ ପୋଲିଙ୍ଗ ବୁଥ କୁ ପଠାଯାଇଛି। ସୁନ୍ଦରଗଡ଼ ଏସ ପି ସାଗରିକା ନାଥ ନିଜେ ବଡ଼ଗାଁ ବ୍ଲକ ରେ ନିର୍ବାଚନ ଜନିତ ସମସ୍ତ କାର୍ଯ୍ୟ ଏବଂ ସୁରକ୍ଷା ବ୍ୟବସ୍ଥା ଯାଞ୍ଚ କରିଥିବା ବେଳେ ବଣେଇ ରେ ଜିଲ୍ଲାପାଳ ନିଖିଲ ପବନ କଲ୍ୟାଣ ନିର୍ବାଚନ କାର୍ଯ୍ୟର ତଦାରଖ କରିଥିଲେ । ସକାଳ ୭ଟାରୁ ଭୋଟଗ୍ରହଣ ଆରମ୍ଭ ହୋଇ ଅପରାହ୍ନ ୧ଟା ଯାଏଁ ଚାଲିବ ।
ସେହିପରି ମତଦାନ ଲାଗି ପରିଚୟ ପତ୍ର ବାଧ୍ୟତାମୂଳକ । ଭୋଟର ଆଇ କାର୍ଡ ନଥିଲେ ମଧ୍ୟ ଅନ୍ୟ ୧୩ଟି ପରିଚୟ ପତ୍ର ଦେଖାଇ ଭୋଟ ଦିଆଯାଇ ପାରିବ । ବୁଥ୍କୁ ଯିବା ସମୟରେ ମାସ୍କ ପିନ୍ଧିବା ଜରୁରୀ । କୋଭିଡ ଆକ୍ରାନ୍ତଙ୍କ ଲାଗି ଭୋଟ ଗ୍ରହଣ କେନ୍ଦ୍ରରେ ସ୍ୱତନ୍ତ୍ର ବ୍ୟବସ୍ଥା କରାଯାଇଛି।