ରାଉରକେଲା ମହାନଗର ନିର୍ବାଚନ ଶୀଘ୍ର କରିବାକୁ ଦାବି।। ନିର୍ବାଚନ ହୋଇନଥିବାରୁ ମୌଳିକ ସେବା ପାଇବାରୁ ଲୋକେ ବଞ୍ଚିତ ଅଭିଯୋଗ।।

ରାଉରକେଲା ପୌରପାଳିକା ରୁ ମହାନଗର ନିଗମ ହେବା ସାତ ବର୍ଷ ହୋଇଗଲାଣି । କିନ୍ତୁ ଏପର୍ଯ୍ୟନ୍ତ ଏହାର ନିର୍ବାଚନ ହୋଇପାରିନାହିଁ । ୨୦୧୩ ମସିହାରେ ନିର୍ବାଚିତ କାଉନସିଲ ର କାର୍ଯ୍ୟକାଳ ପୁରିବା ଠାରୁ ଆଠ ବର୍ଷ ହେଲା ନିର୍ବାଚନ ହେଉନଥିବାରୁ ସହରବାସୀ ମୌଳିକ ସେବା ପାଇବାରୁ ବଞ୍ଚିତ ହେଉଥିବା ଅଭିଯୋଗ ହେଉଛି । ଏବେ ନିକଟ ଭବିଷ୍ୟତରେ ମଧ୍ୟ ନିର୍ବାଚନ ହେବା ନେଇ କୌଣସି ଆଶା ଦେଖାଯାଉନାହିଁ । ଦୁଇଦିନ ତଳେ ୧୦୮ ଟି ପୌରପାଳିକା ଏବଂ ୩ ଟି ମହାନଗର ନିଗମ ନିର୍ବାଚନ ଲାଗି ସରକାର ପ୍ରକ୍ରିୟା ଆରମ୍ଭ କରିଥିବା ବେଳେ ଏଥିରୁ ବାଦ ପଡିଛି ରାଉରକେଲା ଏବଂ ସମ୍ବଲପୁର ମହନଗର ନିଗମ । ଅଦାଲତ ରେ ମାମଲା ଥିବାରୁ ନିର୍ବାଚନ ପ୍ରକ୍ରିୟା ରୁ ବାଦ ପଡିଥିବା କୁହାଯାଉଛି । ତେବେ ଜାଣିଶୁଣି ସରକାର କୋର୍ଟ ମାମଲାର ସମାଧାନ ଚାହୁଁନଥିବା ରାଉରକେଲା ପୂର୍ବତନ ନଗରପାଳ ନିହାର ରାୟ ଅଭିଯୋଗ କରିଛନ୍ତି ।

ଅନ୍ୟ ପକ୍ଷରେ ମହନଗର ନିଗମ ରେ ନିର୍ବାଚିତ ପ୍ରତିନିଧି ନଥିବାରୁ ଲୋକଙ୍କ ସମସ୍ୟା ସମାଧାନରେ ଅସୁବିଧା ସୃଷ୍ଟି ହେଉଛି । ରାସ୍ତାଘାଟ , ଡ୍ରେନ ଆଦିର ସମସ୍ୟା ଲାଗି ରହିଥିବାବେଳେ ନିର୍ବାଚିତ ପ୍ରତିନିଧି ନଥିବାରୁ ସାଧାରଣ ଲୋକ କାହାକୁ କହିବେ ଜାଣିପାରୁନାହାନ୍ତି । ନିର୍ବାଚନ ନହେଉଥିବାରୁ ଜନସାଧାରଣ ମୌଳିକ ସେବା ପାଇବାରୁ ବଞ୍ଚିତ ହେବା ସହ ଗଣତାନ୍ତ୍ରିକ ସଙ୍କଟ ଦେଖାଦେଇଥିବା ଅଭିଯୋଗ କରିଛନ୍ତି ପୂର୍ବତନ ନଗରପାଳ ରଶ୍ମି ବାଳା ମିଶ୍ର ଏବଂ ପୂର୍ବତନ କାଉନସିଲର ବିରେନ ସେନାପତି ।

ରାଉରକେଲା ପୌରପାଳିକାର ପ୍ରଥମ ନିର୍ବାଚନ ୧୯୮୫ ମସିହାରେ ହୋଇଥିବା ବେଳେ ପ୍ରଥମ ନଗରପାଳ ଭାବେ ଦିଲ୍ଲୀପ ରାୟ ନିର୍ବାଚିତ ହୋଇ ୫ ବର୍ଷ ଦାଇତ୍ୱ ନିର୍ବାହ କରିଥିଲେ । ଏହାପରେ ନିହାର ରାୟ ସିଧାସଳଖ ଭାବେ ନଗରପାଳ ଭାବେ ନିର୍ବାଚିତ ହୋଇଥିଲେ । ପରେପରେ କବିତା ରାୟ , ନରେନ୍ଦ୍ର ତ୍ରିପାଠୀ , କାଳନ୍ଦୀ ବଡଜେନା , ରମେଶ ବଳ , ରଶ୍ମି ବାଳା ମିଶ୍ର ପ୍ରମୁଖ ନଗରପାଳ ଭାବେ ଦାଇତ୍ୱ ନିର୍ବାହ କରିଥିଲେ । ଏବେ ମହନଗର ନିଗମ ହେବାପରେ ରାଉରକେଲାରେ ନିର୍ବାଚନ ଖୁବ ଶୀଘ୍ର କରିବାକୁ ସାଧାରଣରେ ମତ ପ୍ରକାଶ ପାଇଛି ।