ସୁନ୍ଦରଗଡ଼ ଜିଲ୍ଲାରେ କୋଭିଡ ଆକ୍ରାନ୍ତଙ୍କ ସଂଖ୍ୟା ୧୨୫୨ , ରାଉରକେଲାରେ ୫୩୬।। କୋଭିଡ ଆକ୍ରାନ୍ତଙ୍କ ଚିକିତ୍ସା ଲାଗି ସ୍ୱତନ୍ତ୍ର ହସ୍ପିଟାଲ ପ୍ରସ୍ତୁତ – ସି ଡି ଏମ ଓ , ଡାକ୍ତର ସରୋଜ କୁମାର ମିଶ୍ର
ସୁନ୍ଦରଗଡ଼(୧୨/୦୧/୨୨) ସୁନ୍ଦରଗଡ଼ ଜିଲ୍ଲାରେ କୋଭିଡର ତୃତୀୟ ଲହରକୁ ମୁକାବିଲା କରିବା ପାଇଁ ଜିଲ୍ଲା ସ୍ୱାସ୍ଥ୍ୟ ବିଭାଗ ପ୍ରସ୍ତୁତ ରହିଛି। କୋଭିଡ୍ ରୋଗୀମାନଙ୍କ ଚିକିତ୍ସା ସେବାରେ ଯେପରି କିଛି ଅସୁବିଧା ନହେବ ସେଥିପାଇଁ ଜିଲ୍ଲାରେ ସ୍ୱାସ୍ଥ୍ୟସେବା ଭିତ୍ତିଭୂମିକୁ ସୁଦୃଢ଼ କରାଯାଉଛି। ବିଶେଷକରି କୋଭିଡ୍ ପରୀକ୍ଷା, ଚିକିତ୍ସା ଏବଂ ଟିକାକରଣକୁ ବ୍ୟାପକ କରିବା ଲାଗି ପଦକ୍ଷେପ ନିଆଯାଉଥିବା ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡାକ୍ତର ସରୋଜ କୁମାର ମିଶ୍ର କହିଛନ୍ତି।
‘‘ସାରା ଦେଶରେ ଏବେ କୋଭିଡ୍ ସ୍ଥିତି ଉଦବେଗଜନକ ରହିଛି। ସୁନ୍ଦରଗଡ଼ ଜିଲ୍ଲାକୁ ରାଜ୍ୟ ବାହାରୁ ବିଭିନ୍ନ ଲୋକମାନଙ୍କର ଯିବା ଆସିବା ଲାଗି ରହିଥିବାରୁ ସଂକ୍ରମଣ ବଢ଼ିଛି। ତେଣୁ ଏହାକୁ ନିୟନ୍ତ୍ରଣ କରିବା ଲାଗି ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ନିଆଯାଉଛି। ଚିକିତ୍ସା ସେବା ଯୋଗାଇଦେବା ଲାଗି ସ୍ୱତନ୍ତ୍ର କୋଭିଡ୍ ହସ୍ପିଟାଲଗୁଡ଼ିକ ପ୍ରସ୍ତୁତ ରହିଥିବା ବେଳେ ସେଠାରେ ସାଧାରଣ ବେଡ୍ ଏବଂ ଆଇସିୟୁ ବେଡ୍ ସହିତ ଅକ୍ସିଜେନ୍ ଆଦି ମହଜୁଦ ରହିଛି। ଆବଶ୍ୟକ ଔଷଧପତ୍ର ମଧ୍ୟ ରହିଛି’’, କହିଛନ୍ତି ଡାକ୍ତର ସରୋଜ କୁମାର ମିଶ୍ର।
ସୁନ୍ଦରଗଡ଼ ସ୍ଥିତ ଏନ୍ଟିପିସି କୋଭିଡ୍ ହସ୍ପିଟାଲରେ ୪୦୦ ଶଯ୍ୟା ରହିଛି। ସେଥିମଧ୍ୟରୁ ୨୦ଟି ଆଇସିୟୁ ଏବଂ ୧୦ଟି ଭେଣ୍ଟିଲେଟର ବେଡ୍ ରହିଛି। ଶିଶୁମାନଙ୍କ ପାଇଁ ୧୦ଟି ଆଇସିୟୁ ପ୍ରସ୍ତୁତ ରଖାଯାଇଛି। ସେହିପରି ରାଉରକେଲାରେ ମଧ୍ୟ ୪ଟି ସ୍ୱତନ୍ତ୍ର କୋଭିଡ୍ ହସ୍ପିଟାଲ ରୋଗୀମାନଙ୍କୁ ଚିକିତ୍ସା ଯୋଗାଇଦେବା ଲାଗି ପ୍ରସ୍ତୁତ ରହିଛି। ହେମଗିର, ବଣାଇଁ ଏବଂ କୋଇଡ଼ା ଅଞ୍ଚଳରେ କୋଭିଡ୍ କେୟାର ସେଣ୍ଟରଗୁଡ଼ିକୁ ମଧ୍ୟ ପ୍ରସ୍ତୁତ କରାଯାଉଛି। ଆବଶ୍ୟକ ପଡ଼ିଲେ ସୁନ୍ଦରଗଡ଼ରେ ମାଦ୍ରୀକାଲୋ ଭବନ ଏବଂ କଲ୍ୟାଣ ମଣ୍ଡପକୁ କୋଭିଡ୍ ଆକ୍ରାନ୍ତଙ୍କ ଚିକିତ୍ସା ପାଇଁ ବ୍ୟବହାର କରାଯିବ ବୋଲି ସିଡିଏମଓ କହିଛନ୍ତି।
ଜିଲ୍ଲାର କୋଭିଡ୍ ହସ୍ପିଟାଲଗୁଡ଼ିକରେ ଆବଶ୍ୟକ ପରିମାଣର ଅକ୍ସିଜେନ୍ ଓ ଭେଣ୍ଟିଲେଟର ଆଦି ମହଜୁଦ୍ ରଖାଯାଇଛି। ରୋଗୀମାନଙ୍କ ସୁବିଧା ପାଇଁ ସୁନ୍ଦରଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟ, ଏନଟିପିସି ହସ୍ପିଟାଲ ଏବଂ ରାଉରକେଲା ସରକାରୀ ଚିକିତ୍ସାଳୟଠାରେ ପିଏସଏ ଅକ୍ସିଜେନ୍ ପ୍ଲାଣ୍ଟ ରହିଛି।
ସେହିପରି ସୁନ୍ଦରଗଡ଼ ଏନଟିପିସି ହସ୍ପିଟାଲରେ ୧୭୪ଟି ଅକ୍ସିଜେନ୍ କନ୍ସିଣ୍ଟ୍ରେଟର ବେଡ୍ ରହିଛି। ଏହାସହ ଜିଲ୍ଲାର ସମସ୍ତ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ୩ଟି କରି ଏବଂ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଗୋଟିଏକରି ଅକ୍ସିଜେନ୍ କନ୍ସିଣ୍ଟ୍ରେଟର ରଖାଯାଇଛି। ତା’ଛଡ଼ା ଜିଲ୍ଲାରେ ୬୦୦ଟି ଜୁମ୍ବୋ ଓ ମିଡିୟମ ଅକ୍ସିଜେନ୍ ସିଲିଣ୍ଡର ରହିଛି।
କୋଭିଡ୍ ନିୟନ୍ତ୍ରଣ ପାଇଁ ଟେଷ୍ଟିଂ ଉପରେ ଗୁରୁତ୍ୱ ଦିଆଯାଉଛି। ସର୍ବସାଧାରଣ ସ୍ଥାନ ଏବଂ ଜନଗହଳିପୂର୍ଣ୍ଣ ଅଞ୍ଚଳରେ କ୍ୟାମ୍ପ କରାଯାଇ କୋଭିଡ୍ ପରୀକ୍ଷା କରାଯାଉଛି। ଏହାସହିତ ଜିଲ୍ଲାର ବିଭିନ୍ନ ସ୍ଥାନରେ ଥିବା ପରୀକ୍ଷା କେନ୍ଦ୍ରରେ କୋଭିଡ୍ ପରୀକ୍ଷା କରାଯାଉଛି। କୋଭିଡ୍ ଆକ୍ରାନ୍ତମାନଙ୍କର ନିୟମିତ ସ୍ୱାସ୍ଥ୍ୟାବସ୍ଥା ବୁଝିବା ଓ ସେମାନଙ୍କୁ ଔଷଧ ଯୋଗାଇଦେବା ପାଇଁ ରାପିଡ୍ ରେସ୍ପନ୍ସ ଟିମ୍ ସକ୍ରିୟ ରହିଛନ୍ତି। ରାଉରକେଲାରେ ୨୦ ଏବଂ ଜିଲ୍ଲାର ଅନ୍ୟ ବ୍ଲକ ପାଇଁ ୩୨ଟି ରାପିଡ୍ ରେସପନ୍ସ ଟିମ୍କୁ ପ୍ରସ୍ତୁତ ରଖାଯାଇଛି।
ଜିଲ୍ଲାରେ କୋଭିଡ୍ ଟିକାକରଣକୁ ପ୍ରଶାସନ ପକ୍ଷରୁ ବ୍ୟାପକ କରାଯାଉଛି। ବିଭିନ୍ନ ବର୍ଗର ବିଭିନ୍ନ ବର୍ଗର ଲୋକମାନେ କୋଭିଡ୍ ସତର୍କତା ଭିତରେ ଆସି ଟିକା ନେଉଛନ୍ତି। ନିକଟରେ ସରକାର ଆଗଧାଡ଼ିର କୋଭିଡ୍ ଯୋଦ୍ଧା ଏବଂ ବହୁବିଧ ରୋଗରେ ପୀଡ଼ିତ ୬୦ ବର୍ଷରୁ ଊର୍ଦ୍ଧ୍ୱ ବରିଷ୍ଠ ନାଗରିକମାନଙ୍କ ଲାଗି ବୁଷ୍ଟର ଡୋଜ୍ ଟିକାକରଣ ଆରମ୍ଭ କରାଯାଇଛି। ତେଣୁ ହିତାଧିକାରୀମାନେ ଉଭୟ ଅନଲାଇନ ଏବଂ ଅନସାଇଟ୍ ପଞ୍ଜୀକରଣ କରି ଟିକା ନେବାକୁ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡାକ୍ତର ମିଶ୍ର କହିଛନ୍ତି।