ରାଜଗାଙ୍ଗପୁର ଅଞ୍ଚଳରେ ପେଟ୍ରୋଲ ପମ୍ପ ଡକାୟତି ଉଦ୍ୟମ ପଣ୍ଡ।। ଦୁଇ ଡକାୟତ ଗିରଫ।। ପିସ୍ତଲ , ଗୁଳି ଜବତ।

ରାଜଗାଙ୍ଗପୁର ପୋଲିସର ତତ୍ପରତା ଯୋଗୁଁ ରାଜପଥ କଡରେ ଥିବା ଏକ ପେଟ୍ରୋଲ ପମ୍ପ ରେ ଡକାୟତି ଉଦ୍ୟମ ପଣ୍ଡ ହୋଇଛି। ପୋଲିସ ଦୁଇଜଣ ଡକାୟତଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ପିସ୍ତଲ ଏବଂ ଜୀବନ୍ତ ଗୁଳି ଜବତ କରିଛନ୍ତି।

ଏହା ସହ ଡକାୟତ ମାନେ ବ୍ୟବହାର କରୁଥିବା ବାଇକ ମଧ୍ୟ ଜବତ ହୋଇଛି। ସୂଚନା ଅନୁଯାୟୀ ଶନିବାର ରାତିରେ ଏକ ବିଶେଷ ସୂତ୍ର ରୁ ଖବର ପାଇ ପୋଲିସ ସ୍ଥାନୀୟ ମନ୍ଦିରା ଡ୍ୟାମ ଅଞ୍ଚଳରେ ବ୍ଲକେଡ଼ କରିଥିଲେ। ଦୁଇ ଜଣ ଯୁବକ ଏକ ମଟର ସାଇକେଲରେ ଲାଇଙ୍ଗ ଆଡ଼କୁ ଆସୁଥିବା ବେଳେ ତାଙ୍କୁ ଅଟକାଇ ପୋଲିସ ଯାଞ୍ଚ କରିବାରୁ ସେମାନଙ୍କ ନିକଟରୁ ଏକ ପିସ୍ତଲ ଏବଂ ଜୀବନ୍ତ ଗୁଳି ଜବତ ହୋଇଥିଲା। ଅଧିକ ପଚରାଉଚୁରା ପରେ ସେମାନେ ନିକଟସ୍ଥ ପେଟ୍ରୋଲ ପମ୍ପ ରେ ଡ଼କାୟତି କରିବାକୁ ଯୋଜନା କରିଥିଲେ ବୋଲି ପୋଲିସ ନିକଟରେ ସ୍ୱୀକାର କରିଥିଲେ । ତେବେ ଏହି ଡକାୟତି ଯୋଜନାରେ ସଂଶ୍ଳିଷ୍ଟ ଅନ୍ୟଜଣେ ଅଭିଯୁକ୍ତ ଫେରାର ହୋଇଯାଇଛି। ଏ ବାବଦରେ ଅଧିକ ତଦନ୍ତ ଜାରି ରହିଛି ବୋଲି ରାଜଗାଙ୍ଗପୁର ଏସ ଡି ପି ଓ ଶଶାଙ୍କ ଶେଖର ବେଉରା କହିଛନ୍ତି।