ରାଉରକେଲା : ମହତାବ ରୋଡ ଫୁଡ୍ କୋର୍ଟ ନିରୀକ୍ଷଣ କଲେ ଆରଏମସି କମିଶନର।। ପରିଷ୍କାର ପରିଚ୍ଛନ୍ନତା , ଖାଦ୍ୟ ଗୁଣବତ୍ତା ଉପରେ ଗୁରୁତ୍ୱ।
ବର୍ଷା ଋତୁରେ ଖାଦ୍ୟ ସୁରକ୍ଷା ଉପରେ କଡ଼ା ନଜର; ମହତାବ ରୋଡ୍ ଫୁଡ୍ କୋର୍ଟରେ ଯାଞ୍ଚ କଲେ RMC କମିଶନର
ରାଉରକେଲା: ୭/୮
(ସତ୍ୟାନ୍ୟୁଜ) ବର୍ଷା ଋତୁରେ ଖାଦ୍ୟ ସଂକ୍ରମଣର ଆଶଙ୍କା ବଢ଼ୁଥିବାରୁ ସହରରେ ରାସ୍ତାକଡ଼ରେ ବିକ୍ରି ହେଉଥିବା ଖାଦ୍ୟର ଗୁଣବତ୍ତା ଏବଂ ପରିଷ୍କାର-ପରିଚ୍ଛନ୍ନତା ଉପରେ ପ୍ରଶାସନ ପକ୍ଷରୁ ବିଶେଷ ଗୁରୁତ୍ୱ ଦିଆଯାଉଛି। ଖାଦ୍ୟ ସୁରକ୍ଷା ବିଭାଗ ପକ୍ଷରୁ ନିୟମିତ ଭାବେ ବିଭିନ୍ନ ଖାଦ୍ୟ ଦୋକାନ ଓ ଷ୍ଟଲ୍ରେ ଯାଞ୍ଚ କରାଯାଇ ଖାଦ୍ୟର ମାନ ଏବଂ ସ୍ୱଚ୍ଛତାର ସ୍ଥିତି ଅନୁଧ୍ୟାନ କରାଯାଉଛି।
ଏହି ପରିପ୍ରେକ୍ଷୀରେ ଶୁକ୍ରବାର ରାଉରକେଲା ମହାନଗର ନିଗମ (RMC) କମିଶନର ଦିନା ଦସ୍ତଗିର୍ ମହତାବ ରୋଡ୍ ସ୍ଥିତ ଫୁଡ୍ କୋର୍ଟରେ ପହଞ୍ଚି ବିଭିନ୍ନ ଫୁଡ୍ ଷ୍ଟଲ୍ର ଅଚାନକ ପରିଦର୍ଶନ କରିଥିଲେ। ସେଠାରେ ଖାଦ୍ୟ ପ୍ରସ୍ତୁତି ପ୍ରଣାଳୀ, ଖାଦ୍ୟ ସାମଗ୍ରୀର ଗୁଣବତ୍ତା, ରୋଷେଇ ସ୍ଥାନର ପରିଷ୍କାର-ପରିଚ୍ଛନ୍ନତା, ବର୍ଜ୍ୟବସ୍ତୁ ପରିଚାଳନା ଓ ଗ୍ରାହକଙ୍କ ପାଇଁ ରହିଥିବା ସ୍ୱାସ୍ଥ୍ୟକର ପରିବେଶର ତଦାରଖ କରିଥିଲେ।
ଯେଉଁ ଫୁଡ୍ ଷ୍ଟଲ୍ଗୁଡ଼ିକରେ ଅପରିଷ୍କାର ପରିବେଶ କିମ୍ବା ସ୍ୱଚ୍ଛତାର ଅଭାବ ଦେଖାଯାଇଥିଲା, ସେଗୁଡ଼ିକର ମାଲିକଙ୍କୁ ତୁରନ୍ତ ସୁଧାର ଆଣିବାକୁ କଡ଼ା ତାଗିଦ୍ କରାଯାଇଥିଲା। ସେହିସହିତ ଗ୍ରାହକଙ୍କୁ ସର୍ବଦା ସତେଜ, ଗୁଣବତ୍ତାସମ୍ପନ୍ନ ଓ ସୁରକ୍ଷିତ ଖାଦ୍ୟ ପରିବେଷଣ କରିବାକୁ ନିର୍ଦ୍ଦେଶ ମଧ୍ୟ ଦିଆଯାଇଥିଲା।
RMC ପକ୍ଷରୁ ସ୍ପଷ୍ଟ କରାଯାଇଛି ଯେ, ଜନସ୍ୱାସ୍ଥ୍ୟକୁ ଦୃଷ୍ଟିରେ ରଖି ଏଭଳି ଯାଞ୍ଚ ଆଗାମୀ ଦିନରେ ମଧ୍ୟ ନିୟମିତ ଭାବେ ଜାରି ରହିବ। ନିୟମ ଉଲ୍ଲଂଘନ କରୁଥିବା ଖାଦ୍ୟ ବ୍ୟବସାୟୀଙ୍କ ବିରୋଧରେ ପ୍ରୟୋଜନୀୟ ପଦକ୍ଷେପ ମଧ୍ୟ ଗ୍ରହଣ କରାଯିବ।