ରାଉରକେଲା : ହୋମ୍ ମେକର୍ ରୁ ହୋମ୍ ବେକର ବନି ଯାଇଛନ୍ତି ରାଉରକେଲାର ମହିଳା ଉଦ୍ୟୋଗୀ।। ରାଜ୍ୟସ୍ତରୀୟ କେକ୍ ପ୍ରଦର୍ଶନୀ ଆୟୋଜିତ।

ରାଉରକେଲା : ୧୯/୧
(ସତ୍ୟାନ୍ୟୁଜ) ଆତ୍ମ ନିର୍ଭରଶୀଳ ହେବା ତଥା ଆତ୍ମ ସମ୍ମାନ ସହ ଜୀବନ ନିର୍ବାହ କରିବାକୁ ଏହି ମହିଳା ମାନେ ଆଗେଇ ଆସିଛନ୍ତି। କିଏ ଛାତ୍ରୀ ତ ଆଉ କିଏ ହାଉସ୍ ୱାଇଫ୍। କିନ୍ତୁ ସମସ୍ତେ ନିଜ ଗୋଡ଼ରେ ଠିଆ ହେବାକୁ ଉଦ୍ୟମ ଜାରି ରଖିଛନ୍ତି। ଏଥିରେ ସହଯୋଗ କରୁଛି ରାଉରକେଲାର ଉମଙ୍ଗ ବେକେରୀ ଏକାଡେମୀ। ମହିଳା ମାନଙ୍କୁ ମାତ୍ର ୬ ଦିନର ଟ୍ରେନିଂ ଦେଇ କେକ୍ ପ୍ରସ୍ତୁତି ବାବଦରେ ସମସ୍ତ କଳା ଶିଖାଇଥିଲେ ଏକାଡେମୀ କର୍ତ୍ତୃପକ୍ଷ। ଆଜି ସେମାନେ ଘରେ କେକ୍ ତିଆରି କରି ହୋମ୍ ମେକର ରୁ ହୋମ୍ ବେକର ବନି ଯାଇଛନ୍ତି। ଘରେ କେକ୍ ପ୍ରସ୍ତୁତ କରି ବଜାରରେ ବିକ୍ରି କରି ସ୍ୱାବଲମ୍ବୀ ହୋଇ ପାରିଛନ୍ତି। ଏହି ଯୁବା ମହିଳା ଉଦ୍ୟୋଗୀଙ୍କୁ ଉତ୍ସାହିତ କରିବା ଲାଗି ଉମଙ୍ଗ ଭାରତ ସୋସିଆଲ ଫାଉଣ୍ଡେସନ ରାଉରକେଲାରେ ଆୟୋଜନ କରିଛି ରାଜ୍ୟ ସ୍ତରୀୟ କେକ୍ ପ୍ରଦର୍ଶନୀ। ମହିଳା ଉଦ୍ୟୋଗୀଙ୍କୁ ଉତ୍ସାହିତ କରିବା ଲାଗି ପ୍ରତି ଛଅ ମାସରେ ଏପରି ପ୍ରଦର୍ଶନୀର ଆୟୋଜନ କରାଯିବ ବୋଲି ଆୟୋଜକ କହି ଛନ୍ତି।