ରାଉରକେଲା : ରେଳ ଷ୍ଟେସନ୍ ରେ ଅସହାୟ ଗର୍ଭବତୀଙ୍କ କନ୍ୟା ସନ୍ତାନ ପ୍ରସବ।। ସହଯୋଗ କଲେ ସାଧାରଣ ମହିଳା ,ଆରପିଏଫ୍।।
ରାଉରକେଲା ରେଳ ଷ୍ଟେସନରେ ଅସହାୟ ଗର୍ଭବତୀଙ୍କ ପ୍ରସବ… ମାନବିକତାର ଉଜ୍ଜ୍ୱଳ ଉଦାହରଣ ସୃଷ୍ଟି କଲେ ଆରପିଏଫ୍, ସ୍ଥାନୀୟ ମହିଳା ଓ ସାଧାରଣ ଲୋକ।
ରାଉରକେଲା:୫/୭ (ସତ୍ୟାନ୍ୟୁଜ) ରାଉରକେଲା ରେଳ ଷ୍ଟେସନରେ ରବିବାର ଦେଖିବାକୁ ମିଳିଛି ଏକ ହୃଦୟସ୍ପର୍ଶୀ ଘଟଣା। ଜଣେ ଅସହାୟ ଓ ଦରିଦ୍ର ଗର୍ଭବତୀ ମହିଳା ହଠାତ୍ ପ୍ରସବ ବେଦନାରେ ଛଟପଟ ହେବା ପରେ ଟିକେଟ୍ କାଉଣ୍ଟର ସମ୍ମୁଖ ଖୋଲା ସ୍ଥାନରେ ହିଁ ଏକ କନ୍ୟା ସନ୍ତାନକୁ ଜନ୍ମ ଦେଇଛନ୍ତି।
ଖବର ପାଇ ରେଳ ସୁରକ୍ଷା ବଳ ବା ଆରପିଏଫ୍ର ମହିଳା କର୍ମଚାରୀମାନେ ତୁରନ୍ତ ସହାୟତା ପାଇଁ ପହଞ୍ଚିଥିଲେ। ସେମାନଙ୍କ ସହ ଷ୍ଟେସନରେ ଥିବା ପରିବା ବିକ୍ରି କରୁଥିବା ସ୍ଥାନୀୟ ମହିଳା, ଅଟୋ ଓ କାର୍ ଚାଳକ ଏବଂ ଅନ୍ୟ ଯାତ୍ରୀମାନେ ମଧ୍ୟ ସହଯୋଗର ହାତ ବଢ଼ାଇଥିଲେ।
ସମସ୍ତଙ୍କ ମିଳିତ ପ୍ରୟାସରେ ଖୋଲା ସ୍ଥାନରେ ହିଁ ସୁରକ୍ଷିତ ଭାବେ ପ୍ରସବ ସମ୍ପନ୍ନ ହୋଇଥିଲା। ମହିଳା ଜଣକ ଏକ ସୁସ୍ଥ କନ୍ୟା ସନ୍ତାନକୁ ଜନ୍ମ ଦେଇଥିବା ବେଳେ ମା’ ଓ ନବଜାତ ଉଭୟ ସୁସ୍ଥ ଅଛନ୍ତି।
ପରେ ୧୦୮ ଆମ୍ବୁଲାନ୍ସ ଯୋଗେ ଉଭୟଙ୍କୁ ଉନ୍ନତ ଚିକିତ୍ସା ପାଇଁ ରାଉରକେଲା ସରକାରୀ ହସ୍ପିଟାଲକୁ ସ୍ଥାନାନ୍ତର କରାଯାଇଛି।
ସୂଚନା ଅନୁସାରେ ଏହା ମହିଳାଙ୍କ ଦ୍ୱିତୀୟ ପ୍ରସବ। ସ୍ୱାମୀ ପୂର୍ବରୁ ତାଙ୍କୁ ପରିତ୍ୟାଗ କରିଥିବାରୁ ସେ ଅତ୍ୟନ୍ତ ଦୟନୀୟ ପରିସ୍ଥିତିରେ ଜୀବନ ବିତାଉଥିଲେ।
ଏହି ଘଟଣା ପୁଣି ଥରେ ପ୍ରମାଣ କରିଛି—ମାନବିକତା ଏବେ ବି ବଞ୍ଚିଛି। ବିପଦ ସମୟରେ ଆରପିଏଫ୍ କର୍ମଚାରୀ, ସ୍ଥାନୀୟ ମହିଳା, ଯାନବାହନ ଚାଳକ ଓ ସାଧାରଣ ଲୋକଙ୍କ ମିଳିତ ସହଯୋଗ ସମସ୍ତଙ୍କ ପାଇଁ ଏକ ପ୍ରେରଣାଦାୟକ ଉଦାହରଣ ସୃଷ୍ଟି କରିଛି।