ରାଉରକେଲା : ବେଦବ୍ୟାସ ଘାଟ ବ୍ରାହ୍ମଣୀ ନଦୀରେ ବୁଡି ଦୁଇ ଇଞ୍ଜିନିଅରିଂ ଛାତ୍ର ମୃତ।। ଜଣେ ଛାତ୍ରୀ ଗୁରୁତର।। ଆରଜିଏଚ ରେ ଭର୍ତ୍ତି।

ରାଉରକେଲା : ୮/୬ (ସତ୍ୟାନ୍ୟୁଜ) ଏକ ଦୁଃଖଦ ଘଟଣାରେ ଆଜି ରାଉରକେଲାର ବେଦବ୍ୟାସ ଘାଟ ବ୍ରାହ୍ମଣୀ ନଦୀରେ ବୁଡି ଦୁଇ ଜଣ ଇଞ୍ଜିନିଅରିଂ ଛାତ୍ର ମୃତ୍ୟୁ ବରଣ କରିଛନ୍ତି। ଅନ୍ୟ ଚାରିଜଣଙ୍କୁ ଉଦ୍ଧାର କରି ରାଉରକେଲା ସରକାରୀ ହସ୍ପିଟାଲରେ ଭର୍ତ୍ତି କରାଯାଇଛି। ତନ୍ମଧ୍ୟରୁ ଜଣେ ଛାତ୍ରୀଙ୍କ ଅବସ୍ଥା ଗୁରୁତର ଥିବା ବେଳେ ଅନ୍ୟ ତିନିଜଣଙ୍କ ସ୍ୱାସ୍ଥ୍ୟବସ୍ଥା ଠିକ ରହିଛି।
ମିଳିଥିବା ସୂଚନା ଅନୁଯାୟୀ ରାଜ୍ୟର ବିଭିନ୍ନ ଇଞ୍ଜିନିଅରିଂ କଲେଜରୁ ଛାତ୍ରଛାତ୍ରୀ ମାନେ ଇଣ୍ଟର୍ଣ୍ଣଶୀପ ପାଇଁ ରାଉରକେଲା ଏନଆଇଟି ଆସିଛନ୍ତି। ସମସ୍ତ ଛାତ୍ରଛାତ୍ରୀ ମାନେ ଏନଆଇଟି ହଷ୍ଟେଲରେ ରହୁଛନ୍ତି। ଶନିବାର ସକାଳେ ୬ ଜଣ ଛାତ୍ରଛାତ୍ରୀ ବେଦବ୍ୟାସ ବୁଲି ଯାଇଥିବା ବେଳେ ବ୍ରାହ୍ମଣୀ ନଦୀରେ ପାଣିରେ ଖେଳୁଥିଲେ। ଏହି ସମୟରେ ଚାରିଜଣ ଛାତ୍ରଛାତ୍ରୀ ସ୍ରୋତରେ ଭାସି ଯାଇଥିଲେ। ସ୍ଥାନୀୟ ଲୋକମାନେ ସେମାନଙ୍କୁ ଉଦ୍ଧାର କରି ରାଉରକେଲା ସରକାରୀ ହସ୍ପିଟାଲ ପଠାଇଥିଲେ। ଡାକ୍ତର ସେଠାରେ ସମିରନ ସୁକୁମାର ନାୟକ ଏବଂ ରଜତ ସାହୁଙ୍କୁ ମୃତ ଘୋଷଣା କରିଥିଲେ। ଅନ୍ୟ ଅସୁସ୍ଥ ମାନଙ୍କୁ ତୁରନ୍ତ ଚିକିତ୍ସା ପ୍ରଦାନ କରାଯାଇଥିଲା। ଖବର ପାଇ
ଏନଆଇଟି ରେଜିଷ୍ଟ୍ରାର ରୋହଣ ଧୀମାନ ଏବଂ ଡ଼ାଇରେକ୍ଟର ଇନଚାର୍ଜ ଚନ୍ଦନ କୁମାର ହସ୍ପିଟାଲ ପହଞ୍ଚି ଥିଲେ । ବିଧାୟକ ସାରଦା ପ୍ରସାଦ ନାୟକ ମଧ୍ୟ ସରକାରୀ ହସ୍ପିଟାଲରେ ପହଞ୍ଚି ଛାତ୍ରଛାତ୍ରୀଙ୍କ ସ୍ୱାସ୍ଥ୍ୟବସ୍ଥା ବୁଝିଥିଲେ। ରାଉରକେଲାର ବିଭିନ୍ନ ନଦୀଘାଟରେ ବାରମ୍ବାର ଏପ୍ରକାର ଅଘଟଣ ଘଟି ଅମୂଲ୍ୟ ଜୀବନ ଯାଉଥିବାରୁ ସେଠାରେ ସତର୍କତା ମୂଳକ ବ୍ୟବସ୍ଥା କରାଯିବ ବୋଲି ବିଧାୟକ କହିଛନ୍ତି।

ହସ୍ପିଟାଲରେ ଭର୍ତ୍ତି ହୋଇଥିବା ଛାତ୍ରଛାତ୍ରୀ ମାନେ ହେଲେ ସମ୍ବିଧାନ ସାହୁ , ଅଭିଲିପ୍ସା ପ୍ରଧାନ ,
ବୈଷ୍ଣୁ ଦେବୀ ଏବଂ ତପନ କୁମାର ପାତ୍ର। ମୃତ ଛାତ୍ର ଦ୍ବୟଙ୍କ ପରିବାରବର୍ଗଙ୍କୁ ସୂଚନା ଦିଆଯାଇଛି ଏବଂ ସେମାନେ ରାଉରକେଲା ଆସୁଥିବା ଏନଆଇଟି କର୍ତ୍ତୃପକ୍ଷ କହିଛନ୍ତି।