ଗୋଟିଏ ଦିନରେ ବଣେଇ ଉପଖଣ୍ଡ ରେ ହାତୀ ଆକ୍ରମଣରେ ଦୁଇଜଣ ଆହତ।। ବନ ବିଭାଗ ଦୃଷ୍ଟି ଦେବାକୁ ସାଧାରଣରେ ଦାବି ।

ସୁନ୍ଦରଗଡ଼ ଜିଲ୍ଲା ବଣେଇ ଉପଖଣ୍ଡ ରେ ହାତୀ ଉପଦ୍ରବ କମିବା ନାଁ ନେଉନାହିଁ । ଆଜି ଗୋଟିଏ ଦିନରେ ବଣେଇ ଉପାଖଣ୍ଡରେ ଦୁଇଜଣ ଯୁବକ ହାତୀ ଆକ୍ରମଣର ଶିକାର ହୋଇ ଆହତ ହୋଇଛନ୍ତି ।

ସେମାନଙ୍କ ଚିକିତ୍ସା ହସପିଟାଲ ରେ ଚାଲିଛି । ସକାଳେ ଲହୁଣୀପଡା ଥାନା ଅନ୍ତର୍ଗତ ପରାଗପୋଷ ଗ୍ରାମରେ ଜଣେ ଯୁବକ ଜଙ୍ଗଲରୁ କାଠ ନେଇ ଆସୁଥିବା ବେଳେ ହାତୀ ଆକ୍ରମଣରେ ଆହତ ହୋଇଥିଲେ । ଆହତ ଯୁବକଙ୍କୁ ରାଉରକେଲା ସରକାରୀ ହସପିଟାଲ ଭର୍ତ୍ତି କରାଯାଇଛି । ସେହିପରି ଆଜି ଅପରାହ୍ନ ରେ କୋଇଡା ଶଙ୍ଖପଡା କୋରମଙ୍ଗ ରେ କ୍ରିଷ୍ଣା ଦେହୁରୀ ନାମକ ଜଣେ ୩୬ ବର୍ଷୀୟ ଯୁବକ ଶୌଚ ସାରି ଘରକୁ ଫେରୁଥିବା ବେଳେ ହାତୀ ଆକ୍ରମଣରେ ଆହତ ହୋଇଛନ୍ତି । ଆହତ ଯୁବକଙ୍କୁ କୋଇଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ରେ ଭର୍ତ୍ତି କରାଯାଇଛି । ଚଳିତ ସପ୍ତାହରେ ବଣେଇ ଉପଖଣ୍ଡ ରେ ହାତୀ ଆକ୍ରମଣରେ ଆହତ ହେବା ଏହା ଚତୁର୍ଥ ଘଟଣା । ଏହା ପୂର୍ବରୁ ବଣେଇ ଅଞ୍ଚଳରେ ଜଣେ ଯୁବତୀ ଏବଂ ଜଣେ ବୟସ୍କା ମହିଳା ହାତୀ ଆକ୍ରମଣର ଶିକାର ହୋଇଥିଲେ । ବଣେଇ ଅଞ୍ଚଳରେ ଏବଂ କୋଇଡା ଅଞ୍ଚଳରେ ଦନ୍ତାହାତୀ ଗୋଠଛଡା ହୋଇ ଲୋକଙ୍କୁ କ୍ଷତି ପହୁଁଚାଉଥିବାରୁ ବନ ବିଭାଗ ଏଥିପ୍ରତି ସତର୍କ ରହିବାକୁ ସାଧାରଣରେ ଦାବି ହେଉଛି ।