ରାଉରକେଲା : ରାଷ୍ଟ୍ରପତିଙ୍କ ଗସ୍ତ ନେଇ ସଜେଇ ହେଉଛି ରାଉରକେଲା।। ପ୍ରଶାସନିକ ସ୍ତରରେ ବ୍ୟାପକ ପ୍ରସ୍ତୁତି।

ରାଉରକେଲା:୧୬/୪(ସତ୍ୟାନ୍ୟୁଜ) ରାଷ୍ଟ୍ରପତିଙ୍କ ଗସ୍ତ ପାଇଁ ସଜେଇ ହେଉଛି ରାଉରକେଲା। ସହରର ରାସ୍ତା ଗୁଡ଼ିକ ନବୀକରଣ କରା ଯିବା ସହ ବିଭିନ୍ନ ସ୍ଥାନରେ ଆକର୍ଷଣୀୟ ପେଣ୍ଟିଂ କରା ଯାଉଛି। ବିଭିନ୍ନ ସ୍ଥାନରେ ଥିବା ବିଦ୍ୟୁତ୍ ଉପକରଣ କୁ ବଦଳା ଯାଉଛି। ଦେଖିବାକୁ ଗଲେ ସହରକୁ ଏକ ନୂଆ ରୂପ ଦିଆ ଯାଉଛି।
ଆସନ୍ତା ୨୧ ତାରିଖରେ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁ ରାଉରକେଲା ଗସ୍ତରେ ଆସୁଛନ୍ତି। ଏହା ରାଷ୍ଟ୍ରପତିଙ୍କ ପ୍ରଥମ ରାଉରକେଲା ଗସ୍ତ ହୋଇଥିବାରୁ ତାଙ୍କୁ ଦେଖିବାକୁ ସହରବାସୀ ଙ୍କ ମଧ୍ୟରେ ଉତ୍କଣ୍ଠା ପ୍ରକାଶ ପାଇଛି। ରାଷ୍ଟ୍ରପତିଙ୍କ ଗସ୍ତ ପାଇଁ ରାଜ୍ୟ ସରକାର ଏବଂ ପ୍ରଶାସନିକ ସ୍ତରରେ ବ୍ୟାପକ ପ୍ରସ୍ତୁତି ଚାଲିଛି। ଅପ୍ରେଲ ୨୧ ରେ ରାଷ୍ଟ୍ରପତି ରାଉରକେଲା ପହଞ୍ଚିବା ପରେ ବିଭିନ୍ନ କାର୍ଯ୍ୟକ୍ରମ ରହିଛି। ତନ୍ମଧ୍ୟରେ ଟ୍ରାଇବଲ୍ ମ୍ୟୁଜିଅମ୍ ର ଉଦ୍ଘାଟନ , ରାଉରକେଲା ୱନ୍ ଆଦି ଉଦ୍ଘାଟନ କାର୍ଯ୍ୟକ୍ରମ ରହିଛି। ରାଷ୍ଟ୍ରପତି ରାଉରକେଲା ବିମାନ ବନ୍ଦରରେ ପହଞ୍ଚିବା ପରେ
ଏଆରପୋର୍ଟ ସନ୍ନିକଟ ପଡ଼ିଆରେ ଏକ ସାଧାରଣ ସଭା ମଧ୍ୟ ଆୟୋଜନ କରା ଯାଉଛି। ଏଥିପାଇଁ ଏବେ ଠାରୁ ପ୍ରସ୍ତୁତି ଆରମ୍ଭ ହୋଇ ଗଲାଣି। ସଭାସ୍ଥଳରେ ବ୍ୟାପକ ଆୟୋଜନ କରାଯାଉଛି। ରାଷ୍ଟ୍ରପତିଙ୍କ କାର୍ଯ୍ୟକ୍ରମ କିପରି ସୁରୁଖୁରୁ ରେ ସମ୍ପନ୍ନ ହେବ ସେଥିଲାଗି ପ୍ରଶାସନ ପକ୍ଷରୁ ଚାଲିଛି ପ୍ରସ୍ତୁତି। ଆଜି ସୁନ୍ଦରଗଡ଼ ଜିଲ୍ଲାପାଳ ଡକ୍ଟର ଶୁଭଙ୍କର ମହାପାତ୍ର , ରାଉରକେଲା ଏସପି ନୀତେଶ ୱାଧୱାନି ଏବଂ ଅନ୍ୟ ବରିଷ୍ଠ ପୋଲିସ୍ ତଥା ପ୍ରଶାସନିକ ଅଧିକାରୀ ମାନେ ସଭାସ୍ଥଳ ପରିଦର୍ଶନ କରି ସୁରକ୍ଷା ବ୍ୟବସ୍ଥାର ସମୀକ୍ଷା କରିଥିଲେ। ରାଷ୍ଟ୍ରପତିଙ୍କ ଗସ୍ତ ସମୟରେ ସୁରକ୍ଷା ବ୍ୟବସ୍ଥା ଯେପରି ତ୍ରୁଟି ଶୂନ୍ୟ ରୁହେ ସେଥିଲାଗି ଏସପି ପୋଲିସ୍ ଅଧିକାରୀ ମାନଙ୍କୁ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦେଇଛନ୍ତି।