ରାଉରକେଲା ଇସ୍ପାତ କାରଖାନା ପକ୍ଷରୁ ସେଲ ସ୍ଥାପନା ଦିବସ ପାଳିତ।। କୋଭିଡ କଟକଣା ମଧ୍ୟରେ ଇସ୍ପାତ ଷ୍ଟାଡିଅମରେ ସେଲ ଗୌରବ ଦିବସ ପାଳନ କରାଗଲା।

ରାଉରକେଲା ଇସ୍ପାତ କାରଖାନା ପକ୍ଷରୁ ଜାନୁଆରୀ ୨୪ ତାରିଖରେ ସେଲ ସ୍ଥାପନା ଦିବସ ପାଳନ କରାଯାଇଥିଲା। ଏହି ଉପଲକ୍ଷେ ଇସ୍ପାତ ଷ୍ଟାଡିୟମଠାରେ ସେଲ୍ ଗୌରବ ଦିବସ ପାଳନ କରାଯାଇଥିଲା। କୋଭିଡ ମାର୍ଗଦର୍ଶିକାଗୁଡିକର କଡାକଡି ଅନୁପାଳନ ପୂର୍ବକ ଏହି ଉତ୍ସବ ପାଳିତ ହୋଇଥିଲା। ଏହି ଉତ୍ସବରେ ଆରଏସପି ଖଣି ବିଭାଗର ନିର୍ବାହୀ ନିର୍ଦ୍ଦେଶକ, ଶ୍ରୀ ଏ କେ କୁଣ୍ଡୁ ସେଲ ପତାକା ଉତ୍ତୋଳନ କରିଥିଲେ।

ଏହା ପରେ ସେଲ ସଙ୍ଗୀତ ପରିବେଷଣ କରାଯାଇଥିଲା। ସେ ଉତ୍ସବ ପାଳନର ଏକ ଅଂଶସ୍ୱରୂପ ଆକାଶକୁ ରଙ୍ଗୀନ ବେଲୁନ୍ ଛାଡିଥିଲେ ଏବଂ ସମସ୍ତଙ୍କୁ ସ୍ୱାସ୍ଥ୍ୟ ଓ ଫିଟନେସ ଶପଥ ପାଠ କରାଇଥିଲେ ।
ମୁଖ୍ୟ ଅତିଥିଙ୍କ ସହିତ କାରଖାନାର କାର୍ଯ୍ୟ ବିଭାଗର ନିର୍ବାହୀ ନିର୍ଦ୍ଦେଶକ, ଶ୍ରୀ ଏସ ଆର ସୂର୍ଯ୍ୟବଂଶୀ, ପ୍ରକଳ୍ପ ବିଭାଗର ନିର୍ବାହୀ ନିର୍ଦ୍ଦେଶକ, ଶ୍ରୀ ଏ କେ ପ୍ରଧାନ, କାର୍ମିକ ଓ ପ୍ରଶାସନ ବିଭାଗର ନିର୍ବାହୀ ନିର୍ଦ୍ଦେଶକ, ଶ୍ରୀ ପି କେ ଶତପଥୀ, ସାମଗ୍ରୀ ପରିଚାଳନା ଓ ମାର୍କେଟିଙ୍ଗ ବିଭାଗର ଭାରପ୍ରାପ୍ତ ମୁଖ୍ୟ ମହାପ୍ରବନ୍ଧକ, ଶ୍ରୀ ସି.ଆର. ମହାପାତ୍ର, ଚିକିତ୍ସା ଓ ସ୍ୱାସ୍ଥ୍ୟସେବା ବିଭାଗର ମୁଖ୍ୟ ମେଡିକାଲ ଅଫିସର, ଡକ୍ଟର ବି.କେ ହୋତା ଏବଂ ଅନ୍ୟ ବରିଷ୍ଠ ଅଧିକାରୀମାନଙ୍କ ସହିତ ଶାରୀରିକ ସୁସ୍ଥତାର ମହତ୍ତ୍ଵକୁ ପ୍ରୋତ୍ସାହିତ କରିବା ପାଇଁ ଷ୍ଟାଡିୟମ ଚାରିପାଖରେ ଚାଲିଥିଲେ । ପ୍ରୋଟୋକଲ, ହସ୍ପିଟାଲିଟି ଓ ସମାଜ କଲ୍ୟାଣ ବିଭାଗର ଜିଏମ, ଶ୍ରୀ ବି କେ ରାଉତ ସ୍ଵାଗତ ଅଭିଭାଷଣ ପ୍ରସ୍ତୁତ କରିଥିଲେ। ସିଆରଏମ ବିଭାଗର ସିନିୟର ଟେକ୍ନିସିଆନ ଶ୍ରୀ ଅନିଲ ମଲ୍ଲିକ ଏହି କାର୍ଯ୍ୟକ୍ରମ ସଂଯୋଜନା କରିଥିଲେ।
ଅପରାହ୍ନରେ କର୍ମଚାରୀ ଏବଂ ସେମାନଙ୍କ ପରିବାର ସଦସ୍ୟଙ୍କ ଦ୍ୱାରା ଉପସ୍ଥାପିତ ଏକ ସାଂସ୍କୃତିକ କାର୍ଯ୍ୟକ୍ରମ ବିଭିନ୍ନ ସାମାଜିକ ଗଣମାଧ୍ୟମ ପ୍ଲାଟଫର୍ମ ମାଧ୍ୟମରେ ଅନଲାଇନରେ ପ୍ରସାରିତ ହୋଇଥିଲା। ଏକ ସଂଗୀତ କାର୍ଯ୍ୟକ୍ରମ ‘ହମ୍ ହିନ୍ଦୁସ୍ତାନୀ’, ଏକ ସ୍କିଟ୍ ‘ମେରା ସେଲ୍ ମେରା ଗୌରବ’, ଲୋକପ୍ରିୟ ସଙ୍ଗୀତ ‘ରଙ୍ଗବତୀ’ର ସ୍ୱରରେ ଏକ ନୃତ୍ୟ ଏବଂ ଓଡ଼ିଶୀ, ପାଲା ଓ ଦାଶକାଠିଆର ମିଶ୍ରଣରେ ଉପସ୍ଥାପିତ ଏକ ନୃତ୍ୟ ନାଟକ ‘ଇସ୍ପାତ କଥା ସରିତା’ର କାର୍ଯ୍ୟକ୍ରମର ମୁଖ୍ୟ ଆକର୍ଷଣ ଥିଲା।
ସୂଚନାଯୋଗ୍ଯ ଯେ, ସେଲ ଏହାର କର୍ମଚାରୀ, ପୂର୍ବତନ କର୍ମଚାରୀ ଓ ସେମାନଙ୍କ ପରିବାରବର୍ଗଙ୍କ ମଧ୍ୟରେ ଗୌରବର ଭାବନାକୁ ଅଧିକ ସୁଦୃଢ କରିବା ନିମନ୍ତେ ସେଲ ସ୍ଥାପନା ଦିବସକୁ ସମଗ୍ର ସେଲରେ ସେଲ ଗୌରବ ଦିବସ ରୂପେ ପାଳନ କରାଯାଉଛି ।
ଉଲ୍ଲେଖଯୋଗ୍ୟ ଯେ, ଷ୍ଟିଲ୍ ଅଥରିଟି ଅଫ୍ ଇଣ୍ଡିଆ ଲିମିଟେଡ୍ ୧୯୭୩ ଜାନୁୟାରୀ ୨୪ ତାରିଖରେ ସ୍ଥାପିତ ହୋଇଥିଲା। ଦେଶର ସର୍ବବୃହତ ଇସ୍ପାତ ନିର୍ମାଣକାରୀଙ୍କ ମଧ୍ୟରୁ ଅନ୍ଯତମ ତଥା ଦେଶର ରାଷ୍ଟ୍ରାୟାତ ମହାରତ୍ନ କମ୍ପାନୀ ସେଲ ଏହାର ୫ ଟି ସମନ୍ଵିତ ଇସ୍ପାତ କାରଖାନା ଯଥା ଭିଲାଇ, ବୋକାରୋ, ଦୁର୍ଗାପୁର, ରାଉରକେଲା ଏବଂ ବର୍ନପୁର ଏବଂ ୩ଟି ସ୍ପେଶାଲ ଷ୍ଟିଲ ପ୍ଳାଣ୍ଟ ଯଥା ଭଦ୍ରାବତୀ, ଦୁର୍ଗାପୁର ଏବଂ ସାଲେମ୍ ରୁ ବିବିଧ ପ୍ରଭେଦର ଇସ୍ପାତ ଉତ୍ପାଦ ପ୍ରସ୍ତୁତ କରୁଛି। ସେଲ ଦେଶର ଦ୍ଵିତୀୟ ସର୍ବବୃହତ ଲୌହପଥର ଉତ୍ତୋଳନକାରୀ ଅଟେ ଏବଂ ଦ୍ଵିତୀୟ ସର୍ବବୃହତ ଖଣି ଶୃଙ୍ଖଳର ଗୌରବ ବହନ କରୁଛି।
ପ୍ରାରମ୍ଭରୁ ଦେଶର ଶିଳ୍ପ ବିକାଶ ପାଇଁ ଏକ ସୁଦୃଢ ଭିତ୍ତିଭୂମି ସ୍ଥାପନ କରିବାରେ ସେଲ ପ୍ରମୁଖ ଭୂମିକା ଗ୍ରହଣ କରିଆସିଛି। ଏହା ବ୍ୟତୀତ ବୈଷୟିକ ଏବଂ ପରିଚାଳନାଗତ ଜ୍ଞାନର ବିକାଶରେ ଏହା ଅତୁଳନୀୟ ଅବଦାନ ରଖିଛି। ଉପଭୋକ୍ତା ଶିଳ୍ପ ପାଇଁ କ୍ରମାଗତ ଭାବରେ ଇନପୁଟ୍ ଯୋଗାଇ ଏହା ଅର୍ଥନୈତିକ ଅଭିବୃଦ୍ଧିର ଦ୍ଵିତୀୟ ଏବଂ ତୃତୀୟ ଲହରକୁ ତ୍ୱରାନ୍ୱିତ କରିଛି।