ପଞ୍ଚାୟତ ନିର୍ବାଚନ : ଚତୁର୍ଥ ଦିନ ସୁଦ୍ଧା ଜିଲ୍ଲାରେ ୩୯୫୫ ଜଣଙ୍କ ପ୍ରାର୍ଥୀପତ୍ର ଦାଖଲ।। ଗୁରୁବାର ଦିନ ଜିଲ୍ଲାରେ ୨୨୧୧ ଜଣ ପ୍ରାର୍ଥୀପତ୍ର ଦାଖଲ କଲେ।

ରାଜ୍ୟରେ ପଞ୍ଚାୟତ ନିର୍ବାଚନ ଲାଗି ପ୍ରାର୍ଥୀପତ୍ର ଦାଖଲର ଆସନ୍ତା କାଲି ଶେଷ ଦିନ। ଆଜି ଚତୁର୍ଥ ଦିନରେ ସୁନ୍ଦରଗଡ଼ ଜିଲ୍ଲାରେ ସମୁଦାୟ ୨୨୧୧ ଜଣ ପ୍ରାର୍ଥୀପତ୍ର ଦାଖଲ କରିଛନ୍ତି । ତନ୍ମଧ୍ୟରୁ ୱାର୍ଡ ମେମ୍ବର ଲାଗି ୧୨୪୭ , ସରପଞ୍ଚ ଲାଗି ୪୮୨, ପଞ୍ଚାୟତ ସମିତି ସଦସ୍ୟ ଲାଗି ୪୦୪, ଜିଲ୍ଲା ପରିଷଦ ସଦସ୍ୟ ଲାଗି ୭୮ ଜଣ ପ୍ରାର୍ଥୀପତ୍ର ଦାଖଲ କରିଛନ୍ତି। ତିନି ପ୍ରମୁଖ ରାଜନୈତିକ ଦଳ ବିଜେପି , ବିଜେଡି , କଂଗ୍ରେସ ସେମାନଙ୍କ ପ୍ରାର୍ଥୀ ତାଲିକା ଚୂଡାନ୍ତ କରି ସାରିଛନ୍ତି। ଏହି ତିନି ଦଳର କେତେକ ପ୍ରାର୍ଥୀ ନାମାଙ୍କନ ପତ୍ର ଦାଖଲ ମଧ୍ୟ କରି ସାରିଲେଣି। ଯେଉଁମାନେ କରିନାହାନ୍ତି ଆସନ୍ତା କାଲି କରିବେ। ଏହି ତିନି ଦଳ ବ୍ୟତୀତ ସିପିଏମ ଦଳ ମଧ୍ୟ ପଞ୍ଚାୟତ ନିର୍ବାଚନରେ ବିଭିନ୍ନ ବ୍ଲକ ରେ ପ୍ରାର୍ଥୀ ଦେଇଛି। ଶାସକ ବିଜୁ ଜନତା ଦଳ ସରକାରଙ୍କ ଉପଲବ୍ଧି ନେଇ ଲୋକଙ୍କ ପାଖକୁ ଭୋଟ ମାଗିବାକୁ ଯିବାକୁ ସ୍ଥିର କରିଛି। ଅନ୍ୟ ପକ୍ଷରେ ବିରୋଧୀ କଂଗ୍ରେସ ,ବିଜେପି , ସିପିଏମ ଜିଲ୍ଲାରେ ଉନ୍ନୟନମୂଳକ କାମରେ ସରକାରୀ ବିଫଳତା କୁ ଅସ୍ତ୍ର କରି ଲୋକଙ୍କ ପାଖକୁ ଯିବାକୁ ସ୍ଥିର କରିଛନ୍ତି।

ଆଜି ପ୍ରାର୍ଥୀପତ୍ର ଦାଖଲର ଥିଲା ଚତୁର୍ଥ ଦିନ। ରାଉରକେଲା ଉପଜିଲ୍ଲାପାଳ ଙ୍କ କାର୍ଯ୍ୟାଳୟରେ ବିଜେପି, କଂଗ୍ରେସ ଏବଂ ସିପିଏମ ର ପ୍ରାର୍ଥୀ ମାନେ ସେମାନଙ୍କ ନାମାଙ୍କନ ପତ୍ର ଦାଖଲ କରିଛନ୍ତି। ବିଶ୍ରା , ନୂଆଗାଁ , ଲାଠିକଟା ଏବଂ କୁଆରମୁଣ୍ଡା ବ୍ଲକ ର ଜିଲ୍ଲା ପରିଷଦ ସଦସ୍ୟ ଲାଗି ପ୍ରାର୍ଥୀ ପତ୍ର ଦାଖଲ ହୋଇଛି। କଂଗ୍ରେସ ର ରାଜଗାଙ୍ଗପୁର ବିଧାୟକ ରାଜନ ଏକ୍କା , ବିଜେପିର ବିରମିତ୍ରପୁର ବିଧାୟକ ଶଙ୍କର ଓରାମ ଏବଂ ସିପିଏମ ନେତା ବିଷ୍ଣୁ ମହାନ୍ତି ପ୍ରମୁଖ ନାମାଙ୍କନ ପତ୍ର ଦାଖଲ ବେଳେ ଉପସ୍ଥିତ ଥିଲେ।

ଗତ ତିନିଦିନ ମଧ୍ୟରେ ଜିଲ୍ଲାରେ ସମୁଦାୟ ୧୭୪୪ ଜଣ ପ୍ରାର୍ଥୀ ପତ୍ର ଦାଖଲ କରିଥିବା ବେଳେ କେବଳ ବୁଧବାର ୧୨୭୭ ଜଣ ପ୍ରାର୍ଥୀ ପତ୍ର ଦାଖଲ କରିଥିଲେ। ତ୍ରିସ୍ତରିୟ ପଞ୍ଚାୟତ ନିର୍ବାଚନ ଲାଗି ଆଜି ଜିଲ୍ଳାରେ ସମୁଦାୟ ୨୨୧୧ ଜଣ ପ୍ରାର୍ଥୀପତ୍ର ଦାଖଲ କରିଛନ୍ତି। ଜିଲାରେ ଏବେ ସୁଦ୍ଧା ସମୁଦାୟ ୩୯୫୫ ଜଣ ପ୍ରାର୍ଥୀପତ୍ର ଦାଖଲ କରିଛନ୍ତି।