ରାଉରକେଲା : ଆର୍ ଏମ୍ ସି କମିସନର ଙ୍କ ଛେଣ୍ଡ୍ ଅଞ୍ଚଳ ରୁଟିନ୍ ଭିଜିଟ୍।। ଫୁଡ୍ କୋର୍ଟ , ହସ୍ପିଟାଲ୍ ପରିଦର୍ଶନ।। ପରିମଳ ବ୍ୟବସ୍ଥା ଉପରେ ଗୁରୁତ୍ବ।

ରାଉରକେଲା:୨୭/୨(ସତ୍ୟାନ୍ୟୁଜ) ରାଉରକେଲା ମହାନଗର ନିଗମ କମିଶନର ଦିନା ଦସ୍ତଗିର୍ ଆଜି ଛେଣ୍ଡ ଅଞ୍ଚଳ ଗସ୍ତ କରି ସେଠାକାର ବିଭିନ୍ନ ସମସ୍ୟା ବାବଦରେ ଅବଗତ ହୋଇଥିଲେ। ବିଶେଷ କରି ଡ୍ରେନେଜ, ରାସ୍ତା, ପରିମଳ, ଜବରଦଖଲ ଆଦି ସମସ୍ୟାର ସମୀକ୍ଷା କରିଥିଲେ। ଶୁକ୍ରବାର ରାସ୍ତା କଡରେ ବସୁଥିବା ହାଟ ବ୍ୟବସାୟୀଙ୍କ ଲାଗି ନିର୍ମାଣ ହେବାକୁ ଥିବା ଟିସ୍କୋ ପିଣ୍ଡିର ଟେଣ୍ଡର ପ୍ରକ୍ରିୟା ଶେଷ ହୋଇଥିବା ବେଳେ କମିଶନର ଏହାର ସମୀକ୍ଷା କରି ନିର୍ମାଣ କାର୍ଯ୍ୟ ଆରମ୍ଭ ପାଇଁ ନିର୍ଦ୍ଦେଶ ଦେଇଥିଲେ। ଏହି ଗସ୍ତ ସମୟରେ କମିଶନର ସେଠାରେ ଥିବା ଏକ ଘରୋଇ ହସ୍ପିଟାଲ ପରିଦର୍ଶନ କରି ପାର୍କିଂ ବ୍ୟବସ୍ଥା ଏବଂ ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥା ଠିକ୍ କରିବାକୁ ପରାମର୍ଶ ଦେଇଥିଲେ।

କମିଶନର ବିଏସଏନ୍ଏଲ ଛକ ନିକଟରେ ଥିବା ଫୁଡ୍ କୋର୍ଟ ପରିଦର୍ଶନ କରିବା ସହ ଦୋକାନୀମାନଙ୍କୁ ଗ୍ରାହକଙ୍କ ସ୍ୱାସ୍ଥ୍ୟ ସୁରକ୍ଷାକୁ ଦୃଷ୍ଟିରେ ରଖି ଖାଦ୍ୟ ସାମଗ୍ରୀ ଘୋଡ଼େଇ ରଖିବା ଲାଗି ନିର୍ଦ୍ଦେଶ ଦେଇଥିଲେ। ଏହାଛଡା ଦୋକାନ ପରିସରର ୫ ମିଟର ପରିଧି ମଧ୍ୟରେ ସ୍ଵଚ୍ଛତା ବଜାୟ ରଖିବା ଏବଂ ଓଦା ଓ ଶୁଖିଲା ବର୍ଜ୍ୟ ବସ୍ତୁ ଲାଗି ଅଲଗା ଅଲଗା ଡଷ୍ଟବିନ୍ ବ୍ୟବହାର ପାଇଁ ପରାମର୍ଶ ଦେଇଥିଲେ।

ଜନସାଧାରଣଙ୍କ ସୁରକ୍ଷାକୁ ଧ୍ୟାନରେ ରଖି ସମସ୍ତଙ୍କୁ ଅନୁମୋଦିତ ବିଲଡିଂ ପ୍ଲାନରେ ହିଁ ଗୃହ ନିର୍ମାଣ କରିବା ଓ ପରେ ଅକୁପେନ୍ସି ସାର୍ଟିଫିକେଟ ହାସଲ ପାଇଁ ପରାମର୍ଶ ଦେଇଥିଲେ। ଏଥି ସହ ଅଧିକାରୀମାନଙ୍କୁ ନିୟମିତ ବ୍ୟବଧାନରେ କ୍ଷେତ୍ର ପରିଦର୍ଶନ କରିବା ସହ ଲୋକଙ୍କ ସମସ୍ୟା ସମାଧାନ ଦିଗରେ ବିହିତ ପଦକ୍ଷେପ ନେବାକୁ ପରାମର୍ଶ ଦେଇଥିଲେ।