ରାଉରକେଲା : ବନ୍ଧମୁଣ୍ଡାରେ ରେଳବାଇ କର୍ମଚାରୀଙ୍କ ଘରୁ ଡକାୟତି ମାମଲାରେ ଆଉ ୩ ଜଣ ଗିରଫ।। ୬ ଲକ୍ଷ ଟଙ୍କାର ସୁନା ଗହଣା ନଗଦ ୪୦ ହଜାର ଜବତ୍।

ରାଉରକେଲା : ୧୫/୧ (ସତ୍ୟାନ୍ୟୁଜ) ରାଉରକେଲା ବନ୍ଧମୁଣ୍ଡା ଥାନା ଅନ୍ତର୍ଗତ ଡିଜେଲ କଲୋନୀରେ ଜଣେ ରେଳବାଇ କର୍ମଚାରୀଙ୍କ ଘରୁ ହୋଇଥିବା ଡକାୟତି ଘଟଣାରେ ପୋଲିସ ଆଜି ପୁଣି ୩ ଜଣଙ୍କୁ ଗିରଫ କରିଛି। ଗିରଫଙ୍କ ମଧ୍ୟରେ ୨ ଜଣ ବିରମିତ୍ରପୁର ର ହୋଇଥିବା ବେଳେ ଜଣେ ବାହାର ରାଜ୍ୟର ଅପରାଧୀ। ସେମାନଙ୍କ ନିକଟରୁ ପୋଲିସ ପ୍ରାୟ ୬ ଲକ୍ଷ ଟଙ୍କା ମୂଲ୍ୟର ୯୦ ଗ୍ରାମ ସୁନା ଏବଂ ନଗଦ ୪୦ ହଜାର ଟଙ୍କା ଜବତ କରିଛନ୍ତି। ପୂର୍ବରୁ ଏହି ଡକାୟତି ମାମଲାରେ ପୋଲିସ ୪ ଜଣଙ୍କୁ ଗିରଫ କରିଥିଲେ। ଗିରଫ ଙ୍କ ମଧ୍ୟରେ ୩ ଜଣ ଅନ୍ତଃ ରାଜ୍ୟ ଡକାୟତ ଥିବା ବେଳେ ଅନ୍ୟ ଜଣେ ଚୋରା ସୁନା ଗହଣା କିଣିଥିବା ବ୍ୟବସାୟୀ ଥିଲେ। ସେତେବେଳେ ପୋଲିସ ୧୦ ଲକ୍ଷ ଟଙ୍କାର ସୁନା ଗହଣା ସହ ନଗଦ ୭୦ ହଜାର ଟଙ୍କା ଜବତ୍ କରିଥିଲେ।
୨୦୨୪ ଅକ୍ଟୋବର ୧୮ ତାରିଖ ରାତିରେ ରେଳବାଇ କର୍ମଚାରୀ ଦିଲ୍ଲୀପ କୁମାର ପଣ୍ଡା ତାଙ୍କ ପରିବାର ସହ ବନ୍ଧମୁଣ୍ଡା ଡିଜେଲ କଲୋନୀ କ୍ୱାର୍ଟର ରେ ଶୋଇଥିବା ବେଳେ ଡକାୟତ ମାନେ ଝରକା ଗ୍ରିଲ୍ କାଟି ପଶିଥିଲେ। ପରେ ଦିଲ୍ଲୀପ , ତାଙ୍କ ପତ୍ନୀ ଏବଂ ଛୋଟ ପୁଅକୁ ବାନ୍ଧି ଛୁରୀ ଦେଖାଇ ପ୍ରାୟ ୨୫ ଲକ୍ଷ ଟଙ୍କାର ସୁନା ଗହଣା ଲୁଟି ନେଇ ଫେରାର ହୋଇ ଯାଇଥିଲେ।
ପୋଲିସ୍ ସିସିଟିଭି ଏବଂ ଅନ୍ୟ ତଥ୍ୟ କୁ ଆଧାର କରି ଡକାୟତ ମାନଙ୍କୁ ଗିରଫ କରିବାରେ ସଫଳ ହୋଇଥିଲେ। ଏହା ସହ ଜବତ୍ ହୋଇଥିବା ୧୦ ଲକ୍ଷ ଟଙ୍କା ମୂଲ୍ୟର ସୁନା ଗହଣା ଏବଂ ୭୦ ହଜାର ଟଙ୍କା ଦିଲ୍ଲୀପ ଏବଂ ତାଙ୍କ ପରିବାର ବର୍ଗଙ୍କୁ ହସ୍ତାନ୍ତର କରିଥିଲେ।