ରାଉରକେଲା: ଜେପି ହସ୍ପିଟାଲରେ ଅତ୍ୟାଧୁନିକ ମାତୃ ଓ ଭ୍ରୁଣ ଔଷଧ କ୍ଲିନିକ୍ ଉଦ୍ଘାଟିତ।। ଗର୍ଭାବସ୍ଥାରେ ଯାଞ୍ଚ ଉପରେ ଗୁରୁତ୍ୱାରୋପ।

ରାଉରକେଲା:୪/୭
(ସତ୍ୟା ନ୍ୟୁଜ) ମାତୃ ଓ ଗର୍ଭସ୍ଥ ଶିଶୁଙ୍କ ସ୍ୱାସ୍ଥ୍ୟସେବାକୁ ଆହୁରି ସୁଦୃଢ଼ କରିବା ଦିଗରେ ଜେପି ହସ୍ପିଟାଲର ଏକ ବଡ଼ ପଦକ୍ଷେପ। ହସ୍ପିଟାଲରେ ଆରମ୍ଭ ହୋଇଛି ଅତ୍ୟାଧୁନିକ ମାତୃ ଓ ଭ୍ରୁଣ ଔଷଧ କ୍ଲିନିକ୍। ଏବେ ବିପଦପୂର୍ଣ୍ଣ ଗର୍ଭାବସ୍ଥା ଓ ଭ୍ରୁଣ ସ୍ୱାସ୍ଥ୍ୟ ସମ୍ବନ୍ଧୀୟ ସମସ୍ତ ଉନ୍ନତ ଚିକିତ୍ସା ସେବା ଗୋଟିଏ ଛାତ ତଳେ ମିଳିବ।
ଜେପି ହସ୍ପିଟାଲରେ ନବନିର୍ମିତ ମାତୃ ଓ ଭ୍ରୁଣ ଔଷଧ କ୍ଲିନିକକୁ ଡାକ୍ତର ସ୍ତୁତି ଖାରେ ଉଦ୍ଘାଟନ କରିଥିଲେ। ଏହି ଅବସରରେ ଡାକ୍ତର ପୀୟୁଷ ବଂଶଲ ଓ ଡାକ୍ତର ସୁଜାତା କୁମାରୀଙ୍କ ସମେତ ବହୁ ବରିଷ୍ଠ ଚିକିତ୍ସକ ଉପସ୍ଥିତ ଥିଲେ।
ଉଦ୍ଘାଟନ ପରେ ଡାକ୍ତର ସ୍ତୁତି ଖାରେ କହିଥିଲେ, ଗର୍ଭାବସ୍ଥାରେ ନିୟମିତ ଯାଞ୍ଚ ଓ ଭ୍ରୁଣର ସ୍ୱାସ୍ଥ୍ୟ ନିରୀକ୍ଷଣ ମା’ ଏବଂ ଶିଶୁ ଉଭୟଙ୍କ ପାଇଁ ଅତ୍ୟନ୍ତ ଜରୁରୀ। ଆଧୁନିକ ଭ୍ରୁଣ ଚିକିତ୍ସା ମାଧ୍ୟମରେ ଜନ୍ମଗତ ତ୍ରୁଟି କିମ୍ବା ଜଟିଳତାକୁ ପୂର୍ବରୁ ଚିହ୍ନଟ କରି ସମୟୋଚିତ ଚିକିତ୍ସା ସମ୍ଭବ ହୋଇପାରିବ।
ଏହି କ୍ଲିନିକରେ ଉଚ୍ଚ ବିପଦପୂର୍ଣ୍ଣ ଗର୍ଭଧାରଣର ନିରୀକ୍ଷଣ, ଉନ୍ନତ ଭ୍ରୁଣ ପରୀକ୍ଷା ଏବଂ ବିଶେଷଜ୍ଞ ପରାମର୍ଶ ଭଳି ସେବା ଉପଲବ୍ଧ ହେବ, ଯାହା ମାତୃ ଓ ଶିଶୁ ମୃତ୍ୟୁହାର ହ୍ରାସ ସହ ସୁରକ୍ଷିତ ପ୍ରସବରେ ସହାୟକ ହେବ।
କାର୍ଯ୍ୟକ୍ରମରେ ହସ୍ପିଟାଲର ପରିଚାଳନା ନିର୍ଦ୍ଦେଶକ ଡାକ୍ତର ଚନ୍ଦନ ବଂଶଲ, ମେଡିକାଲ ଅଧୀକ୍ଷକ ଡାକ୍ତର ସୁଚିତ୍ରା ସାହୁ, ନର୍ସିଂ ଅଧୀକ୍ଷକ ବୋନି ଏମ୍. ବାଜରୟଙ୍କ ସମେତ ବହୁ ବରିଷ୍ଠ ଅଧିକାରୀ ଯୋଗଦେଇ ଉନ୍ନତ ସ୍ୱାସ୍ଥ୍ୟସେବା ପ୍ରଦାନ ପାଇଁ ହସ୍ପିଟାଲର ପ୍ରତିବଦ୍ଧତା ଦୋହରାଇଥିଲେ।
ମାତୃ ଓ ଭ୍ରୁଣ ଔଷଧ କ୍ଲିନିକର ଶୁଭାରମ୍ଭ ସହ ଅଞ୍ଚଳର ଗର୍ଭବତୀ ମହିଳାମାନେ ଏବେ ଅଧିକ ସୁରକ୍ଷିତ, ଆଧୁନିକ ଓ ବିଶେଷଜ୍ଞ ସ୍ୱାସ୍ଥ୍ୟସେବାର ସୁବିଧା ପାଇବେ। ମାତୃ ସ୍ୱାସ୍ଥ୍ୟ କ୍ଷେତ୍ରରେ ଏହାକୁ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ବୋଲି କୁହାଯାଉଛି।