କୋଭିଡ ସଂକ୍ରମଣ ନିୟନ୍ତ୍ରଣ ଲାଗି ସୁନ୍ଦରଗଡ଼ ଜିଲ୍ଲାରେ ୬୭ ଟି ରାପିଡ଼ ରେସପନ୍ସ ଟିମ ।। ସଙ୍ଗରୋଧରେ ଥିବା ବ୍ୟକ୍ତିଙ୍କ ସ୍ୱାସ୍ଥ୍ୟବସ୍ଥା ତଦାରଖ କରୁଛନ୍ତି।
ସୁନ୍ଦରଗଡ଼ ଜିଲ୍ଲାରେ କୋଭିଡର ତୃତୀୟ ଲହରକୁ ମୁକାବିଲା କରିବା ଲାଗି ୬୭ଟି ରାପିଡ୍ ରେସପନ୍ସ ଟିମ୍ (ଆରଆରଟି) ଗଠନ କରାଯାଇଛି। ସେମାନେ ନିୟମିତ ବ୍ୟବଧାନରେ ଘର ଘର ବୁଲି ହୋମ୍ ଆଇସୋଲେସନରେ ଥିବା ବ୍ୟକ୍ତିଙ୍କ ଶରୀରର ତାପମାତ୍ରା ଓ ଅକ୍ସିଜେନ୍ ସ୍ତର ରେକର୍ଡ କରୁଛନ୍ତି। କୋଭିଡ୍ ଆକ୍ରାନ୍ତ ଏବଂ ଲକ୍ଷଣ ଥିବା ବ୍ୟକ୍ତିଙ୍କୁ ମାଗଣାରେ ଔଷଧ ଏବଂ ଚିକିତ୍ସା ପରାମର୍ଶ ଦେଉଛନ୍ତି।
ସୁନ୍ଦରଗଡ଼ ଜିଲ୍ଲାରେ ଥିବା ୬୭ଟି ଆରଆରଟି ଭିତରୁ କେବଳ ରାଉରକେଲା ସହରରେ ୧୦ଟି ଟିମ କାମ କରୁଛନ୍ତି। ଏହାସହ ସୁନ୍ଦରଗଡ଼, ବୀରମିତ୍ରପୁର ଓ ରାଜଗାଙ୍ଗପୁର ପୌରପାଳିକା ଅଞ୍ଚଳରେ ୨ଟି ଲେଖାଏଁ ଟିମ୍ ରହିଛନ୍ତି। ସେହିପରି ସମସ୍ତ ୧୭ଟି ବ୍ଲକରେ ୩ଟି କରି ୫୧ଟି ଆରଆରଟି ଗଠନ କରାଯାଇଛି।
ପ୍ରତି ଆରଆରଟିରେ ଜଣେ ଲେଖାଏଁ ଡାକ୍ତର, ଫାର୍ମାସିଷ୍ଟ ଏବଂ ସ୍ୱାସ୍ଥ୍ୟ କର୍ମୀମାନେ ରହିଛନ୍ତି। ତୃଣମୂଳ ସ୍ତରରେ ଆଶା, ଅଙ୍ଗନବାଡ଼ି କର୍ମୀଙ୍କ ସହିତ ଗାଁ କଲ୍ୟାଣ ସମିତି ଏବଂ ରୋଗୀ କଲ୍ୟାଣ ସମିତିର ସଦସ୍ୟମାନେ ଆରଆରଟିକୁ ସହଯୋଗ କରୁଛନ୍ତି।
କୋଭିଡ୍ ସଂକ୍ରମଣ ନିୟନ୍ତ୍ରଣ କରିବା ପାଇଁ ସୁନ୍ଦରଗଡ଼ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ କାର୍ଯ୍ୟକ୍ରମ ହାତକୁ ନିଆଯାଉଛି। କୋଭିଡ୍ ପରୀକ୍ଷା, ଚିକିତ୍ସା ଏବଂ ଟିକାକରଣ ଉପରେ ଗୁରୁତ୍ୱ ଦିଆଯାଉଛି। ଗୃହ ସଙ୍ଗରୋଧ ବା ହୋମ ଆଇସୋଲେସନରେ ରହୁଥିବା ଆକ୍ରାନ୍ତମାନଙ୍କ ସ୍ୱାସ୍ଥ୍ୟାବସ୍ଥା ଯାଞ୍ଚ ସହିତ ଆବଶ୍ୟକ ଚିକିତ୍ସା ପରାମର୍ଶ ଯୋଗାଇ ଦେବା ଲାଗି ଜିଲ୍ଲାର ପ୍ରତ୍ୟେକ ବ୍ଲକ ଓ ସହରାଞ୍ଚଳରେ ନିୟୋଜିତ ଥିବା ଆରଆରଟି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି। ଲକ୍ଷଣ ଥିବା ବ୍ୟକ୍ତିଙ୍କୁ କୋଭିଡ୍ ପରୀକ୍ଷା କରିବାକୁ ପରାମର୍ଶ ଦେଉଛନ୍ତି।
ଏହି ଟିମ୍ ନିୟମିତ ବ୍ୟବଧାନରେ ହୋମ୍ ଆଇସୋଲେସନରେ ରହୁଥିବା ବ୍ୟକ୍ତିଙ୍କୁ ଭେଟୁଛନ୍ତି। ଯଦି କାହାର ସ୍ୱାସ୍ଥ୍ୟରେ ଜଟିଳତା ପରିଲକ୍ଷିତ ହେଉଛି ସେମାନେ ତୁରନ୍ତ ସ୍ୱାସ୍ଥ୍ୟ ବିଭାଗକୁ ଖବର ଦେଉଛନ୍ତି। ଆମ୍ବୁଲାନ୍ସ ଯୋଗେ ରୋଗୀଙ୍କୁ କୋଭିଡ୍ କେୟାର ସେଣ୍ଟର କିମ୍ବା କୋଭିଡ୍ ହସ୍ପିଟାଲକୁ ପଠାଯାଉଛି।
କୋଭିଡ୍ ଟିକାକରଣକୁ ବ୍ୟାପକ କରିବା ପାଇଁ ପ୍ରଶାସନ ଗୁରୁତ୍ୱ ଦେଉଛି। ତେଣୁ ଆରଆରଟି ସଦସ୍ୟମାନେ ଏନେଇ ଜନସାଧାରଣଙ୍କୁ ସଚେତନ କରୁଛନ୍ତି। ବିଭିନ୍ନ ବର୍ଗର ହିତାଧିକାରୀମାନେ କିପରି ପଞ୍ଜୀକରଣ କରି ଟିକା ନେବେ ସେଦିଗରେ ଆରଆରଟି ସହାୟତା କରୁଛି।