ରାଉରକେଲା : ଜର୍ଜ ତିର୍କୀ ହେବେ ସ୍ୱାଧୀନ ପ୍ରାର୍ଥୀ। ବିରମିତ୍ରପୁର ନିର୍ବାଚନ ମଣ୍ଡଳୀରେ ରାଜନୈତିକ ଗତିବିଧି ଜୋର ଧରିଲା।। ‘ଜର୍ଜ ସେନା’ର କର୍ମୀ ସମ୍ମିଳନୀ।।

ରାଉରକେଲା : ୧୯/୨ (ସତ୍ୟାନ୍ୟୁଜ) ସୁନ୍ଦରଗଡ଼ ଜିଲ୍ଲାର ୭ଟି ନିର୍ବାଚନ ମଣ୍ଡଳୀ ମଧ୍ୟରେ ବିରମିତ୍ରପୁର ଏକ ଗୁରୁତ୍ୱପୂର୍ଣ୍ଣ ବିଧାନସଭା କ୍ଷେତ୍ର। ଏହି ନିର୍ବାଚନ ମଣ୍ଡଳୀରେ ଟାଣୁଆ ଆଦିବାସୀ ନେତା ଜର୍ଜ ତିର୍କିଙ୍କ ବେଶ ଦବଦବା ରହିଛି। ସେ ଏଠାରୁ ୪ ଥର ବିଧାୟକ ଭାବେ ନିର୍ବାଚିତ ହୋଇଛନ୍ତି। କିନ୍ତୁ ଗତ ନିର୍ବାଚନରେ ଏହି ବିଧାନସଭା କ୍ଷେତ୍ରରୁ ବିଜେପିର ଶଙ୍କର ଓରାମ ବିଧାୟକ ଭାବେ ନିର୍ବାଚିତ ହୋଇଥିଲେ। ୨୦୧୯ ବିଧାନସଭା ନିର୍ବାଚନରେ ଜର୍ଜ ସେଠାରେ ପ୍ରତିଦ୍ବନ୍ଦିତା କରିନଥିଲେ। ଫଳରେ ବିଜେପିକୁ ବିଜୟ ଲାଭ କରିବା ସୁବିଧା ହୋଇଥିଲା। ଚଳିତ ବିଧାନସଭା ନିର୍ବାଚନରେ ବିରମିତ୍ରପୁର ନିର୍ବାଚନ ମଣ୍ଡଳୀରୁ ଜର୍ଜ ତିର୍କୀ ପୁଣି ଲଢ଼ିବାକୁ ଅଣ୍ଟା ଭିଡିଛନ୍ତି। ଏଥିପାଇଁ ସେଠାରେ ସେ ତାଙ୍କର ରାଜନୈତିକ ଗତିବିଧି ଆରମ୍ଭ କରି ଦେଇଛନ୍ତି। ରବିବାର ଦିନ ‘ଜର୍ଜ ସେନା’ ର ଏକ କର୍ମୀ ସମ୍ମିଳନୀ ବିରମିତ୍ରପୁରରେ ହୋଇଥିଲା। ବ୍ଲକ , ପଞ୍ଚାୟତ ସ୍ତରର ବହୁ ପୁରୁଣା କର୍ମୀ ଏଥିରେ ଯୋଗ ଦେଇଥିଲେ। ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ିବାକୁ ଜର୍ଜ ନିଷ୍ପତ୍ତି ନେଇଥିବା କଣା ପଡିଛି।

ବିଜୁ ଜନତା ଦଳ ମଧ୍ୟ ବିରମିତ୍ରପୁର ବିଧାନସଭା ମଣ୍ଡଳୀରେ ନିଜ ଜୋର ଲଗାଇ ଦେଇଛି। ଏଠାରେ ବିଜେଡି ଏପର୍ଯ୍ୟନ୍ତ ବିଜୟର ସ୍ୱାଦ ଚାଖି ନାହିଁ। ଚଳିତ ନିର୍ବାଚନରେ ନବୀନଙ୍କ ଲୋକପ୍ରିୟତାକୁ ଆୟୁଧ କରି ବିଜେଡି ନିର୍ବାଚନ ମଇଦାନରେ ଅବତୀର୍ଣ୍ଣ ହେବ। ତେବେ ଚଳିତ ନିର୍ବାଚନରେ ଏହି ନିର୍ବାଚନ ମଣ୍ଡଳୀରେ ବିଜେଡି , ବିଜେପି , କଂଗ୍ରେସ ,ଜେଏମଏମ୍ ଏବଂ ଜର୍ଜ ସେନା ମଧ୍ୟରେ କଡା ଟକ୍କର ହେବା ନେଇ ପୂର୍ବ ସୂଚନା ମିଳୁଛି।