ରାଉରକେଲା ମହାନଗର ନିଗମ ପକ୍ଷରୁ ଅନ୍ତର୍ଜାତୀୟ ମହିଳା ଦିବସ ପାଳିତ।

ରାଉରକେଲା, ୮ ମାର୍ଚ୍ଚ ୨୦୨୨: ରାଉରକେଲା ମହାନଗର ନିଗମ ପକ୍ଷରୁ ଅନ୍ତର୍ଜାତୀୟ ମହିଳା ଦିବସ ଅବସରରେ ‘ବିଜୟିନୀ’ କାର୍ଯ୍ୟକ୍ରମ ପାଳନ କରାଯାଇଛି। ଛେଣ୍ଡସ୍ଥିତ ଆହୁତି ଭବନଠାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ରାଉରକେଲା ଅତିରିକ୍ତ ଜିଲ୍ଲାପାଳ ତଥା ମହାନଗର ନିଗମ କମିଶନର ଡାକ୍ତର ଶୁଭଙ୍କର ମହାପାତ୍ର ଯୋଗଦେଇ ମହିଳାମାନଙ୍କୁ ଅଭିନନ୍ଦନ ଜଣାଇଥିଲେ।

ସେ କହିଥିଲେ ଯେ, ରାଉରକେଲା ସହରର ବିକାଶରେ ମହିଳାମାନଙ୍କର ସହଯୋଗ ରହିଛି। ପାରମ୍ପରିକ କାମ ସହିତ ବିଭିନ୍ନ କ୍ଷେତ୍ରରେ ମହିଳାମାନେ ସେମାନଙ୍କର ପାରଦର୍ଶିତା ଦେଖାଉଛନ୍ତି। ରାଉରକେଲା ସହରରେ ଚାଲିଥିବା ଅତ୍ୟାଧୁନିକ ପରିମଳ ପରିଚାଳନାରେ ମହିଳାମାନଙ୍କୁ ସ୍ୱଚ୍ଛ ସାଥୀ ଭାବେ ନିୟୋଜିତ କରାଯାଇଥିବା ବେଳେ ବର୍ଜ୍ୟବସ୍ତୁ ପରିଚାଳନାରେ ମହିଳାମାନଙ୍କୁ ସାମିଲ କରାଯାଇଛି। ଆଶା ଓ ଅଙ୍ଗନବାଡ଼ି କର୍ମୀମାନେ ମଧ୍ୟ ବିଭିନ୍ନ ଜନକଲ୍ୟାଣକାରୀ କାର୍ଯ୍ୟକ୍ରମରେ ଯୋଗଦାନ କରୁଛନ୍ତି। ପୁରୁଷମାନଙ୍କ ସହିତ ନାରୀମାନଙ୍କର ଏମିତି ସହଯୋଗ ରହିଲେ ରାଉରକେଲା ସହର ଆହୁରି ଆଗକୁ ଯାଇପାରିବ।

ଅନ୍ତର୍ଜାତୀୟ ମହିଳା ଦିବସ ପାଳନ ଅବସରରେ ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରିଥିବା ମହିଳାମାନଙ୍କୁ ରାଉରକେଲା ମହାନଗର ନିଗମ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା। ରାଉରକେଲା ସହରରେ ସ୍ୱଚ୍ଛ ସୁପରଭାଇଜର ଭାବେ କାମ କରୁଥିବା ସ୍ୱୟଂ ଜୟା ଦାସଙ୍କୁ ସମ୍ମାନିତ କରାଯାଇଥିବା ବେଳେ ସ୍ୱଚ୍ଛ ସାଥୀ ଭାବେ କାମ କରୁଥିବା ସଞ୍ଜୁ ବେହେରାଙ୍କୁ ସମ୍ବର୍ଦ୍ଧିତ କରାଯାଇଛି।

ସେହିପରି ଗୋଷ୍ଠୀ ଶୌଚାଳୟ ପରିଚାଳନା କରୁଥିବା ବାଲୁଘାଟର ମା’ ଦୁର୍ଗା ମହିଳା ସ୍ୱୟଂ ସହାୟକ ଗୋଷ୍ଠୀକୁ ସମ୍ବର୍ଦ୍ଧିତ କରାଯାଇଛି। ପରିମଳା କର୍ମଚାରୀ ଦାମିନୀ ବେହେରା ଏବଂ ସରସ୍ୱତୀ ଓରାମଙ୍କୁ ସମ୍ବର୍ଦ୍ଧିତ କରାଯାଇଥିବା ବେଳେ ବିପିୟୁଟି ପରିସରରେ ଥିବା ବର୍ଜ୍ୟବସ୍ତୁ ପରିଚାଳନା କେନ୍ଦ୍ର ପରିଚାଳନା ଦାୟିତ୍ୱରେ ଥିବା ପ୍ରତିଷ୍ଠା ଏସଏଚଜିକୁ ସମ୍ବର୍ଦ୍ଧିତ କରାଯାଇଛି। ଜଳସାଥୀ ଭାବେ କାର୍ଯ୍ୟ କରୁଥିବା ରୁପାଲି ମଣ୍ଡଳଙ୍କୁ ମଧ୍ୟ ମହାନଗର ନିଗମ ପକ୍ଷରୁ ସମ୍ବର୍ଦ୍ଧିତ କରାଯାଇଛି। ନିକଟରେ ବ୍ଲୁମବର୍ଗ ମେୟର୍ସ ଚାଲେଞ୍ଜ ରାଉରକେଲା ସହର ୧୫ତମ ସ୍ଥାନ ପାଇଥିଲା। ସେଥିରେ ଅନ୍ତର୍ଭୁକ୍ତ ଥିବା ମା’ ତାରିଣୀ ମହିଳା ସ୍ୱୟଂ ସହାୟକ ଗୋଷ୍ଠୀଙ୍କ ସଫଳ ଅବଦାନ ପାଇଁ ତାଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଛି।

ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ରାଉରକେଲା ମହାନଗର ନିଗମର ଡେପୁଟି କମିଶନର ସୁଧାଂଶୁ କୁମାର ଭୋଇ, ଡକ୍ଟର ଗୌରବମୟ ପ୍ରଧାନ, ଷ୍ଟେଟବ୍ୟାଙ୍କ ମ୍ୟାନେଜର ସନ୍ତୋସିନୀ ପତି, ମୁନିସିପାଲ କଲେଜ ଓଡ଼ିଆ ବିଭାଗର ମୁଖ୍ୟ ଅପର୍ଣ୍ଣା ଧର, ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ସୀମା ଫାତିମା ଏକ୍କା ପ୍ରମୁଖ ଉପସ୍ଥିତ ଥିଲେ। ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇଥିଲା।