ରାଉରକେଲା- ଝାରଖଣ୍ଡ ରାସ୍ତାରେ ମାଓବାଦୀ ପୋଷ୍ଟର।। ଦୁଇ କେନ୍ଦ୍ରୀୟ କମିଟି ସଦସ୍ୟଙ୍କୁ ଖଲାସ ଦାବି।
ଓଡ଼ିଶା-ଝାଡ଼ଖଣ୍ଡ ସୀମାନ୍ତରେ ନିଜର ଉପସ୍ଥିତି ଜାହିର କରିଛି ମାଓବାଦୀ ସଙ୍ଗଠନ। ସିଆର୍ପିଏଫ୍ ଯବାନ ଓ ସ୍ଥାନୀୟ ପୁଲିସକୁ ଚକ୍ମା ଦେଇ ରାଉରକେଲା-ଝାଡ଼ଖଣ୍ଡର ରାସ୍ତା ଭାଲୁଲତା ଓ ବମ୍ବୁଆ ରାସ୍ତାରେ ପୋଷ୍ଟର ଓ ବ୍ୟାନର ଲଗାଇଛନ୍ତି। ଦୁଇ ସିପିଆଇ ମାଓନେତାଙ୍କୁ ମୁକ୍ତ ଦାବିରେ ମାଓବାଦୀ ଏଭଳି କାଣ୍ଡ ଭିଆଇଥିବା ପୁଲିସ ପ୍ରାଥମିକ ତଦନ୍ତରୁ ଜଣା ପଡ଼ିଛି। ପୁଲିସ ଦୁଇ ତିନିଟି ସ୍ଥାନରେ ଲାଗିଥିବା ପୋଷ୍ଟରଗୁଡ଼ିକୁ କାଢ଼ି ନେଇଛି। ସେମାନଙ୍କ ଗତିବିଧି ଉପରେ କଡା ନଜର ରଖାଯାଇଛି। ଅନ୍ୟପକ୍ଷରେ ଦୀର୍ଘଦିନ ବ୍ୟବଧାନ ପରେ ଭାଲୁଲତା ଅଞ୍ଚଳରେ ପୁନର୍ବାର ମାଓବାଦୀ ପୋଷ୍ଟର ଲଗାଇଥିବାରୁ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି। ସିଆର୍ପିଏଫ୍ ଓ ସ୍ଥାନୀୟ ପୁଲିସ ପକ୍ଷରୁ ସୀମାନ୍ତ ଜଙ୍ଗଲରେ କମ୍ବିଂ ଅପରେସନ୍କୁ ଜୋରଦାର କରାଯାଇଛି। ସିପିଆଇ ମାଓବାଦୀ କେନ୍ଦ୍ରୀୟ କମିଟି ବ୍ୟୁରୋ ପ୍ରଶାନ୍ତ ବୋଷ ଏବଂ ତାଙ୍କ ପତ୍ନୀ ଶୀଳା ମାରାଣ୍ଡିଙ୍କୁ ମୁକ୍ତି ଦାବିରେ ମାଓବାଦୀ ସଙ୍ଗଠନ ପକ୍ଷରୁ ଗତକାଲିଠୁ ୨୪ ଘଣ୍ଟିଆ ବନ୍ଦ ଡାକରା ଦିଆଯାଇଥିଲା। ବନ୍ଦରେ ସମ୍ଭାବ୍ୟ ହିଂସାକାଣ୍ଡକୁ ଦୃଷ୍ଟିରେ ରଖି ଓଡ଼ିଶା-ଝାଡ଼ଖଣ୍ଡ ସୀମାନ୍ତ ଉଭୟ ରାଜ୍ୟର ପୁଲିସ ଓ ସିଆର୍ପିଏଫ୍ ଯବାନ ମୁତୟନ ହୋଇଥିଲେ। ସିଆର୍ପିଏଫ୍ ୧୯୭ ବାଟାଲିୟନ ପକ୍ଷରୁ ଏକ ଟିମ୍ ବିଶ୍ରା ଭାଲୁଲତା ଷ୍ଟେସନ ନିକଟରେ ଅସ୍ଥାୟୀ କ୍ୟାମ୍ପ କରିଛନ୍ତି। ଉଭୟ ସିଆର୍ପିଏଫ୍ ଓ ସ୍ଥାନୀୟ ପୁଲିସକୁ ଚାଲେଞ୍ଜ ଦେଇ ମାଓବାଦୀମାନେ ଗତକାଲି ବିଳମ୍ବିତ ରାତିରେ ବିଶ୍ରା ବ୍ଲକ ଭାଲୁଲତା ଅଞ୍ଚଳରେ ପୋଷ୍ଟର ଓ ବ୍ୟାନର ଲଗାଇଛନ୍ତି। ପୋଷ୍ଟରରେ ଦୁଇ ସିପିଆଇ ନେତାଙ୍କୁ ମୁକ୍ତ କରିବାକୁ ଦାବି କରାଯାଇଛି। ପୁଲିସ କହିବାନୁଯାୟୀ ନକ୍ସଲମାନେ ଏହି ଅଞ୍ଚଳରେ ଆତଙ୍କ ସୃଷ୍ଟି କରିବା ଉଦ୍ଦେଶ୍ୟରେ ଏହି ପୋଷ୍ଟର ଲଗାଇଛନ୍ତି। ଗୁଇନ୍ଦା ବିଭାଗ ରିପୋର୍ଟ ଅନୁଯାୟୀ ଓଡ଼ିଶା ଓ ଝାଡ଼ଖଣ୍ଡ ସୀମାନ୍ତ ସରଣ୍ଡା ଓ ପୋଡାହାଟ ଜଙ୍ଗଲରେ ଗତ କିଛି ଦିନ ଧରି ମାଓବାଦୀଙ୍କ ଗତିବିଧି ବୃଦ୍ଧି ପାଇଛି। ମାଓବାଦୀମାନେ କିଛି ବଡଧରଣ ହିଂସାକାଣ୍ଡ ଭିଆଇବାକୁ କରିଥିବା ଯୋଜନା ପଣ୍ଡ ହୋଇଛି। ଅନ୍ୟପଟେ ଓଡ଼ିଶାରେ ଆଗାମୀ ଫେବୃଆରୀ ୧୬ରୁ ହେବାକୁ ଯାଉଥିବା ପଞ୍ଚାୟତ ନିର୍ବାଚନରେ ମାଓବାଦୀମାନେ ହିଂସାକାଣ୍ଡ ଭିଆଇବାକୁ ସମ୍ଭାବନା ରହିଥିବାରୁ ଓଡ଼ିଶା-ଝାଡ଼ଖଣ୍ଡ ସୀମାନ୍ତରେ ଯାଞ୍ଚ ବ୍ୟବସ୍ଥାକୁ କଡାକଡି କରାଯାଇଛି। ମାଓବାଦୀଙ୍କ ଗତିବିଧି ଉପରେ କଡା ନଜର ରଖାଯାଇଛି।