ସୁନ୍ଦରଗଡରେ ପଞ୍ଚାୟତ ନିର୍ବାଚନ ଲାଗି ଭୋଟ ପ୍ରଚାର ଆରମ୍ଭ।। କୋଭିଡ ପ୍ରୋଟୋକଲ ଅନୁସାରେ ପ୍ରଚାର।

ପଞ୍ଚାୟତ ନିର୍ବାଚନ ଲାଗି ସୁନ୍ଦରଗଡ ରାଜନୀତି ସରଗରମ ହୋଇ ଉଠିଛି। ୱାର୍ଡ ମେମ୍ବର , ସରପଞ୍ଚ , ସମିତି ସଭ୍ୟ , ଜିଲ୍ଲା ପରିଷଦ ସଦସ୍ୟ ଲାଗି ନିର୍ବାଚନୀ ଚିହ୍ନ ମିଳିବା ପରେ ପ୍ରାର୍ଥୀ ମାନେ ନିଜ ନିଜ ସପକ୍ଷରେ ଭୋଟ ଲାଗି ପ୍ରଚାର ଆରମ୍ଭ କରିଦେଲେଣି। ଏବେ କୋଭିଡ କଟକଣା ଯୋଗୁଁ ନିର୍ବାଚନୀ ପ୍ରଚାରରେ ସେପରି ଭିଡ଼ କିମ୍ବା ହୋ ହଲ୍କା ନାହିଁ। ପ୍ରାର୍ଥୀ ମାନେ ନିଜ ନିର୍ବାଚନ ପ୍ରଚାରରେ ସାଙ୍ଗରେ ଦୁଇ ତିନି ଜଣଙ୍କୁ ନେଇ ଯାଉଛନ୍ତି ଏବଂ ଘର ଘର ବୁଲି ଭୋଟ ମାଗୁଛନ୍ତି। ନିର୍ବାଚନ କମିଶନ ଡିଜିଟାଲ ପ୍ରଚାର ଉପରେ ଜୋର ଦେଉ ଥିବା ବେଳେ କେତେକ ଅଞ୍ଚଳ ରେ ନେଟୱାର୍କ ସମସ୍ୟା ଯୋଗୁଁ ଡିଜିଟାଲ ପ୍ରଚାର ହୋଇପାରୁନାହିଁ। ସେହି କ୍ଷେତ୍ରରେ ପ୍ରାର୍ଥୀ ମାନେ ସୀମିତ ଲୋକଙ୍କୁ ନେଇ ପ୍ରଚାର କରୁଛନ୍ତି। କିଏ ଘରକୁ ଘର ବୁଲି ମାସ୍କ ବାଣ୍ଟି ଭୋଟ ମାଗୁ ଥିବା ବେଳେ ଆଉ କିଏ ଅଞ୍ଚଳର ଉନ୍ନତି କରିବା ପ୍ରତିଶୃତି ଦେଇ ଭୋଟ ମାଗୁଛି।

ଅନ୍ୟ ପକ୍ଷରେ ସରକାରୀ ସ୍ତରରେ ମଧ୍ୟ ନିର୍ବାଚନ ଲାଗି ସମସ୍ତ ପ୍ରସ୍ତୁତି ଚାଲିଛି। ଗୁରୁବାର ଦିନ ସୁନ୍ଦରଗଡ ଜିଲ୍ଲା ନିର୍ବାଚନୀ ଅଧିକାରୀଙ୍କ ସହ ୧୮ ଟି ଜିଲ୍ଲା ପରିଷଦ ପ୍ରାର୍ଥୀ ମାନଙ୍କ ବୈଠକ ହୋଇଥିଲା। ଏହି ବୈଠକରେ ନିର୍ବାଚନୀ ଖର୍ଚ୍ଚ ହିସାବ କିପରି ଦିଆଯିବ ସେନେଇ ଆଲୋଚନା ହୋଇଥିଲା। ନିର୍ବାଚନରେ ବ୍ୟବହୃତ ହେବାକୁ ଥିବା ଗାଡି ଏବଂ ମାଇକ ର ଅନୁମତି ନେବାକୁ ପ୍ରାର୍ଥୀ ମାନଙ୍କୁ ପରାମର୍ଶ ଦିଆଯାଇଥିଲା। ତେବେ କୋଭିଡ ପ୍ରୋଟୋକଲ ମଧ୍ୟରେ ନିର୍ବାଚନ ହେବ ବୋଲି ସୁନ୍ଦରଗଡ଼ ଉପଜିଲ୍ଲାପାଳ ଅଭିମନ୍ୟୁ ବେହେରା କହିଛନ୍ତୁ।