୧୫ ରୁ ୧୮ ବର୍ଷ ବର୍ଗଙ୍କୁ କୋଭିଡ ଟୀକାକରଣ।। ସୁନ୍ଦରଗଡ଼ ଜିଲ୍ଲାରେ ଏପର୍ଯ୍ୟନ୍ତ ୫୨ ହଜାର ହିତାଧିକାରୀ ନେଲେଣି ଟୀକା।
ସାରା ଦେଶରେ ୧୫ରୁ ୧୮ ବର୍ଷ ବୟସ ବର୍ଗର ହିତାଧିକାରୀମାନଙ୍କ ପାଇଁ କୋଭିଡ୍ ଟିକାକରଣ ଚାଲିଛି। ସୁନ୍ଦରଗଡ଼ ଜିଲ୍ଲାରେ ସଚେତନ କିଶୋର କିଶୋରୀମାନେ ମଧ୍ୟ ଆଗ୍ରହର ସହ ଟିକାକରଣ କେନ୍ଦ୍ରକୁ ଆସି କୋଭିଡ୍ ଟିକା ନେଉଛନ୍ତି। ଜାନୁୟାରୀ ୩ରୁ ୨୩ ତାରିଖ ମଧ୍ୟରେ ଏହି ବର୍ଗର ୫୨ ହଜାରରୁ ଅଧିକ ହିତାଧିକାରୀ କୋଭିଡ୍ର ପ୍ରଥମ ଡୋଜ୍ ଟିକା ନେଇସାରିଲେଣି।
“କୋଭିଡ୍ ମୁକାବିଲାରେ ପ୍ରତିଷେଧକ ଟିକା ଏକ ପ୍ରମୁଖ ଅସ୍ତ୍ର । ତେଣୁ ସମସ୍ତଙ୍କ ପାଇଁ ଟିକା ନେବା ଅତି ଜରୁରୀ। ସୁନ୍ଦରଗଡ଼ ଜିଲ୍ଲା ଜନସଂଖ୍ୟାର ଏକ ବଡ଼ ଭାଗ ହେଉଛନ୍ତି ଯୁବବର୍ଗ। ବିଶେଷକରି ୧୫ରୁ ୧୮ ବର୍ଷ ବୟସର ହିତାଧିକାରୀମାନେ ନିଜ ସ୍ଲଟ୍ ଅନୁସାରେ କୋଭିଡ୍ର ଦୁଇଟି ଡୋଜ୍ ଟିକା ନିଅନ୍ତୁ। ଏହାସହ ପରିବାର ଲୋକଙ୍କୁ ମଧ୍ୟ ଟିକା ନେବା ପାଇଁ ସଚେତନ କରାନ୍ତୁ। ସମସ୍ତେ କୋଭିଡ୍ ଉପଯୋଗୀ ଆଚରଣ ପାଳନ କରନ୍ତୁ”, କହିଛନ୍ତି ସୁନ୍ଦରଗଡ଼ ଜିଲ୍ଲାପାଳ ନିଖିଲ ପବନ କଲ୍ୟାଣ।
ସୁନ୍ଦରଗଡ଼ ଜିଲ୍ଲାରେ ୧୫ରୁ ୧୮ ବର୍ଷ ବୟସ ବର୍ଗର ୧ ଲକ୍ଷ ୨୧ ହଜାର ୬୫୯ ଜଣ ହିତାଧିକାରୀଙ୍କୁ କୋଭିଡ୍ ଟିକା ଦେବା ପାଇଁ ପ୍ରଶାସନ ଲକ୍ଷ୍ୟ ରଖିଛି। ଏହି ବର୍ଗର ହିତାଧିକାରୀଙ୍କୁ କୋଭିଡ୍ ଟିକା ଦେବା ପାଇଁ ଜିଲ୍ଲା ପ୍ରଶାସନ ଓ ସ୍ୱାସ୍ଥ୍ୟ ବିଭାଗ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି।
ଜିଲ୍ଲାର ସମସ୍ତ ୧୭ଟି ବ୍ଲକରେ ଥିବା କୋଭିଡ୍ ଟିକାକରଣ କେନ୍ଦ୍ର ବ୍ୟତୀତ ବିଭିନ୍ନ ସ୍କୁଲ ଓ କଲେଜରେ ସ୍ୱତନ୍ତ୍ର ଶିବିର କରାଯାଇ ଟିକାକରଣ ଚାଲିଛି। ହିତାଧିକାରୀମାନେ କୋୱିନ୍ ପୋର୍ଟାଲକୁ ଯାଇ ଅନ୍ଲାଇନ୍ ସ୍ଲଟ୍ ବୁକିଂ କରି ଟିକା ନେଉଛନ୍ତି। ଯେଉଁମାନେ ଅନ୍ଲାଇନ୍ ବୁକିଂ କରିନାହାନ୍ତି, ସେମାନେ ଅନ୍ ସାଇଟ୍ରେ ପଞ୍ଜୀକୃତ କରି କୋଭିଡ୍ ଟିକା ନେଉଛନ୍ତି।
ସୁନ୍ଦରଗଡ଼ ଜିଲ୍ଲାରେ ଜାନୁୟାରୀ ୩ ତାରିଖରୁ ୧୫ରୁ ୧୮ ବର୍ଷ ବର୍ଗଙ୍କ ପାଇଁ ଟିକାକରଣ ଆରମ୍ଭ ହୋଇଥିଲା। ଜାନୁୟାରୀ ୨୩ ତାରିଖ ସୁଦ୍ଧା ଏହି ବର୍ଗର ୫୨ ହଜାର ୮୩୨ ଜଣ କୋଭିଡ୍ର ପ୍ରଥମ ଡୋଜ୍ ଟିକା ନେଇସାରିଛନ୍ତି। କରୋନା ମୁକାବିଲା ପାଇଁ ଜିଲ୍ଲାରେ ଟିକାକରଣ ଅଭିଯାନକୁ ତ୍ୱରାନ୍ୱିତ କରାଯାଇଥିବା ବେଳେ ଟେଷ୍ଟିଂ ଓ ଟ୍ରାକିଂକୁ ମଧ୍ୟ ଗୁରୁତ୍ୱ ଦିଆଯାଉଛି।
